پنجگور نا علاقہ پروم ئٹ نادرست بندغ آتا سم کاری نا نتیجہ ئٹ اسہ بندغ اس مرگ ئنا گواچی مس۔
کہوک بندغ نا چاہنداری اختر انور نا پن آن مسنے۔
احوالکار آتا رد ئٹ اختر انور تدوک وخت ئٹ بلوچ سلہہ بند تنظیم تون مسوسس۔ داہم پاننگانے کہ او تینا اسہ سنگت ئسے کسفنگ آن گڈ پاکستانی لشکر نا مون آ سلہہ بٹیسس۔
تدینی نا سوب آک دمدستی وڑ آ پاش مننگ کتنو۔
بلوچستان نا ضلع کیچ و پنجگور آن پاکستانی لشکر مُسہ بندغ ءِ دزگیر کرسا بیگواہ کرینے۔
بیگواہ کننگوک بندغ تا چاہنداری حاصل خان نا مار ندیم، تاج محمد نا مار محمد تاج و امان اللہ نا مار سلیمان نا پِن تیٹ مسنے۔
حوالکار تا ردئٹ ندیم ءِ استو ضلع کیچ نا علاقہ تمپ ملک آباد ئٹ اُرا غا چھاپہ خلسا دزگیر کننگانے ہراڑان پد او بیگواہ ءِ۔
اندن ہفتدہ مارچ آ ضلع کیچ نا علاقہ شاپک آن محمد تاج و پنجگور نا علاقہ خدابادان آن سلیمان ءِ دزگیر کننگانے ہراڑان پد اوفک بیگواہ ءُ۔
بلوچستان نا علاقہ مستونگ و زامران ئٹ اینو سہب آن پاکستانی لشکر کشی برجاء ءِ، گن شپ ہیلی کاپٹر آتیتون اوار ڈرون طیارہ غاک لشکر کشی نا بشخ ءُ اندن سلہہ بند جھڑپ آتا ہم حوال رسینگانے۔
مستونگ نا علاقہ دشت، کمبیلا ٹی اینو پاکستانی لشکر علاقہ ءِ پلویڑ کرسا لشکر کشی نا بنا کرے۔ دا وخت آ فورسز آتے جلہو آتیتون مون تروئی تما۔ ایسری حوال تے اسکان علاقہ ئٹ ترند سم کاری و تراک آتا توار بِننگ ئٹ بسنے۔
داکان بیدس زامران نا علاقہ نوانو و ایب کیب ئٹ اینو سہب ئنا گن شپ ہیلی کاپٹر و ڈرون طیارہ غاتا بال خننگانے۔
علاقائی حوالکار تا ردئٹ فورسز آک علاقہ ئٹ لشکر کشی کننگ ءُ۔
یاتی مرے درو زامران نا اندا علاقہ ٹی پاکستانی لشکر کن سامان دروک اِرا گاڑی ءِ سلہہ بند بندغ آک جلہو ئٹ ٹک کننگ آن پد خاخر تسوسر۔
لشکر کشی تا بابت کوالخواک دائسکان شابیتی حوال تتنو۔
بلوچستان نا ضلع مستونگ نا علاقہ کردگاپ گرگینہ ئٹ اینو سہب ئنا پاکستانی لشکر نا آپریشن برجا ءِ، ہرا نا نیام ئٹ فورسز نا سم کاری آن اِرا ورنا ترند ٹپی مسر۔
شابیتی حوال آتا رد ئٹ آپریشن نا وخت کردگاپ نا علاقہ کلی مینگی نا خڑک فورسز سم کاری کریسہ اِرا ورنا، فاصل خان و ظاہر، ترند ٹپی کرے۔ ہڑتوم آ ٹپی تے دمدستی اول سول ہسپتال کوئٹہ سر کننگانے، ہراڑے اوفتے طبی کمک تننگسہ ءِ۔
احوالکار آتا رد ئٹ ٹپی مروک ہڑتوم آ ورناک بے ڈوہ ئسر و تینا ڈغار تیٹ کاریم کریسہ ئسر ہراتم اوفتا سم کاری کننگا۔ ہڑتوم آ بندع آک سیال ہم پاننگرہ۔
پین احوال آتا رد ئٹ علاقہ ئٹ بھلو کچ اسیٹ فوج و طاغت ءِ کاریم ئٹ ہتنگ مننگسہ ءِ، ہندن مننگ کروک جانی نسخان آتا ہم حوال نا ڈس مریسہ ءِ، واہم اوفتا پٹ و پول دسکان مننگ کتنے۔
پنجگور نا علاقہ پروم آن چار بندغ نا جون تا خننگ نا حوال رسینگانے۔
حوالکار تا ردئٹ جون تے پروم جائین اسپتال آ دننگا، ہراڑے اوفتا چاہنداری و تدینی نا بابت پٹ و پول برجاء ءِ۔
بنائی حوال تا ردئٹ ہر چار بندغ ءِ پاکستانی لشکر نا پارہ غان اسپتال آ اتنگا۔ پِن کروک جون تیان اِرٹ نا چاہنداری حمزہ نا مار مروان و حاجی محمد نا مار ہاتم نا پِن ئٹ مسنے۔
ہندی بندغ آتا ردئٹ اوفتے 5 اپریل 2026 آ زوراکی ئٹ بیگواہ کننگاسس۔ ایلو اِرا بندغ نا چاہنداری نا کاریم برجاء ءِ۔
بلوچستان نا بنجاہی شار کوئٹہ ٹی ایگل اسکواڈ ءِ بمب تراک ئٹ ٹِک کننگانے۔
کوئٹہ نا قمبرانی روڈ آ اللہ والا مسیت نا خڑک آ ایگل اسکواڈ نا موٹر سائیکل آ سوار کارندہ غاتے بمب تراک ئٹ ٹِک کننگانے۔
حوالکار آتا رد ئٹ تراک ہمو وخت آ مس ہراتم ایگل اسکواڈ نا کارندہ غاک موٹر سائیکل آ گدرینگنگ ئسر۔
تراک ئٹ کارندہ غاتے نسخان ارفنگ نا احوال ءِ واہم فورسز علاقہ ءِ گھیڑ ئٹ ہلسہ کس ءِ ہمو ہند آ ہِلیتو۔
یاتی مرے ایگل اسکواڈ آ غیر قانودی دزگیر، بیدادی و کھسفنگ تون اوار دروغ نا مون تس ئٹ بلوچ آتے خلنگ نا ڈوبہ تیٹ برجاء دے تیٹ ودکی مسنے۔
مسہ دے مست ایگل اسکواڈ نا کارندہ غاک کوئٹہ ٹی اسہ ورناس خالد ساسولی ءِ ہمو وخت آ سم کاری کرسہ کھسفے ہراتم او دتر تننگ آن گڈ اسپتال آن پدی بننگ ئس۔
داکان مست تدوکا ہفتہ ٹی اسرار احمد پنی ءُ ورناس غیر قانودی دزگیر کرسہ بیدادی ئٹ کھسفیر۔ اسرار احمد نا باوہ محمد انور نا پاننگے کہ اونا چناء ءِ شش دے مالو ایگل اسکواڈ نا کارندہ غاک دزگیر کریسر، واہم اودے او دزگیری نا باروٹ ہچو تھانہ سے آن پَک حوال رسینگتو۔
او پارے کہ ولدا اودے ایس پی سریاب نا پارہ غان فون کال رسینگا ہراٹی پاننگا کہ اونا مار گمانی وڑ ئٹ تینے تینا پُچ آتا آنجہ ٹی پاہو تسونے کسفینے۔
واہم پدا پن کروک ورنا نا بے دادی آن زدہ غا جون خاہوت ءِ رسینگا۔
بلوچستان نا ضلع خضدار نا علاقہ زہری ٹی پاکستانی لشکر و اونا مخ تف سلہہ بند ٹولی ‘ ڈیتھ اسکواڈز’ لس آباتی ءِ ٹِک کریر۔
احوال کار آتا رد ئٹ فورسز و ڈیتھ اسکواڈز اُرا تیا سم کاری تون اوار کہیی بندغ آتے دزگیر کننگ آن گڈ اوفتے کھسفینو۔
علاقہ ٹی احوالکاری بست و بند آتا مفنگ و فوجی گھیڑ ئنا سوب وخت آ حوال آتا رسینگنگ ممکن اف۔
ایران 5 عرب ڈیہہ تیان معاوضہ نا خواست کرینے، ہرافتیٹی سعودی عرب، متحدہ عرب امارات، بحرین، قطر و اردن اوار ءُ، و اوفتیا دوبہ خلکنے کہ او ایران آ امریکی و اسرائیلی جلہو آتیٹ اوار ئسر۔
اقوام متحدہ نا سیکریٹری جنرل انتونیو گوتریش و اقوام متحدہ نا سلامتی کونسل نا صدر جمال فارس الرویعی نا پن آ چِٹی اسیٹی، ایران نا اقوام متحدہ ٹی نمائندہ سعید ایروانی دعویٰ کرے کہ دا ریاست آک گمانی وڑ آ ایران نا برخلاف امریکہ و اسرائیل نا جلہو آتے ممکن جوڑ کریسہ تینا “جہانی ذمہ واری تا برخلافی ءِ کرینو۔
او پارے کہ نتیجہ ئٹ اوفتے ذمہ وار پاننگے و جنگ ئنا نیام ئٹ مروک آ نسخان آتا معاوضہ تننگے۔
خاران نا علاقہ شیروزی ئٹ نادرست سلہہ بندغ آک پولیس کارندہ تے دزگیر کریسہ اوفتا سِلاہ تے ہلکر، واہم پدا کارندہ آتے یلہ کننگا۔
احوالکار آتا رد ئٹ سلہہ بند بندغ آک ناگمان کاروائی کریسہ پولیس کارندہ آتے تینا کوزہ ٹی کرے و اوفتان سرکاری سِلاہ تے ہلیسہ تینتو دریر۔ تدینی نا وخت کارندہ تے ہچ وڑ ئنا جانی نسخان تننگتو۔
احوال آتا رد ئٹ سلہہ بند بندغ آک کاروائی آن گڈ نادرست کسر اسیٹ نرار، ہندن تدینی آن گڈ پولیس و ایلو ادارہ غاک علاقہ ئٹ تفتیش ءِ بنا کرینو۔
یاتی مرے کہ داڑان مالو ہم بلوچستان نا جتا علاقہ آتیٹ ہندنو تدینی مون آ بسونے، ہراڑے سلہہ بند بندغ آتا پارہ غان سیکیورٹی کارندہ آتا سِلاہک پھلنگانو، واہم بلوچ مننگ نا بنداو آ کارندہ آتے نسخان تننگ آن بیدس یلہ کننگانے۔
کالخواہ تا پارہ غان تدینی نا نوعیت و ذمہ واری نا تعین کن پین پٹ و پول برجا ءِ۔
کوئٹہ نا علاقہ سریاب روڈ آ سلہہ بند بندغ آتا سم کاری آن مُسہ بندغ ہمو وخت مرگ ئنا گواچی مسر ہندن اِرا بندغ ٹپی مسر۔
کہوک بندغ آتا چاہنداری ہارون ولد جمیل مینگل، غفور ولد وحید بخش و نصیب اللہ نا پن تیٹ مسونے۔ ٹپی تیٹ عبدالحفیظ و میر جمیل اوار ءُ، ہرا سول ہسپتال آ سر کننگار۔
احوالکار آتا رد ئٹ میر جمیل مینگل نا گاڑی آ عدالت ئٹ پیشی آن واپسی آ جلہو کننگا، ہراٹی میر جمیل تینٹ ٹپی مس، ہندن او نا مار ہارون و مینگل و اِرٹ پین ہمو وخت مرگ ئنا گواچی مسر۔
واہم تدینی نا سوب آک دسکان مون آ بتنو۔
