ضلعی انتظامیہ کھٹیا خور آتا خلاف سخت کاروائی کے ۔ شاری تا خواست

بلوچستان نا دارالحکومت کوئٹہ ٹی اسے توہ نا تہٹی سبزی تا نرخ آتیٹی 20 آن الیس 30 فیصد اسکان ودکی مس۔

‎کوئٹہ ٹی پرائس کنٹرول کمیٹی نا کاریم کپرنگ نا سوب آن کھٹیا خور آک سبزی تے ہم کبین کریر۔ مٹر نا کلو 200 روپی، بھینڈی 150 آن 200 روپی کلو، توم و ادرک 250 آن 300 روپی کلو ٹی دوئی مننگو۔

‎داڑان بیدس ٹماٹر و پیماز نا نرخ آ تیٹی ام ودکی کننگانے۔

‎نرخ آتیٹی اسے جہی مفرنگ نا سوب آن ہلوک آتون اوار دکاندار آک ہم فریشان ءُ۔ دکاندار آتا پاننگ ءِ کہ پیٹرول ارزان مسونے ولے پیٹرول پمپ آک بند ءُ، پیٹرول کبین ملنگ ءِ ہرانا سوب آن سبزیک ام کبین ملنگ ءُ۔

‎شار والاک خواست کرینو کہ کہ ضلعی انتظامیہ کھٹیا خور آتا خلاف سخت کاروائی کے و پرائس کنٹرول کمیٹی آن کاریم ہلے۔

اولیکو وار جہانی میوزک اسٹریمنگ ایپس آتیا براہوئی فنکار وسیم عالم نا شئر آ امنائی، ہرا شینک مس۔

دا اولیکو وار ءِ کہ براہوئی شئر پاروک ئسے نا شئر اسہ وخت آ 150 آن زیات ایپس آتیا باقاعدہ آن لائن شینک مرو۔ داکان مالو میر احمد بلوچ و منہاج بلوچ نے پن ئٹ ساؤنڈ کلاؤڈ آ شئرک شینک مریسہ کرینو۔

نوشکے آن تعلقدار وسیم عالم براہوئی شئر باگل نا پِڑ آ چنکو وخت اسیٹی بھاز پنی مروک ورنا ئسے۔ ہرا کیسٹ نا وخت آن شئر پاننگ ءِ بناء کرے و دا وخت اسکان بھلو کچ اسیٹی شئر پارینے۔

علی ساقی نا نوشتہ کروک شئر ‘گم سُم’ ءِ وسیم عالم پارینے ہرادے آن لائن شینک کننگانے۔ دا شئر دا وخت اسکان  ڈیزر، انغامی، یوٹیوب میوزک، ایپل میوزک/آئی ٹیونز، سپوٹی فائی، ٹک ٹاک آ شینک کننگانو۔

وسیم عالم نا شئر ءِ شینک کننگ ئٹ شاعر و ادیب عمران فریق کمک کرینے۔ عمران فریق ٹی بی پی تون ہیت کریسہ پارے کہ براہوئی فنکار آتا شوق آک ڈجیٹل دور نا بنا غان گڈ او وڑ سلتور ہرا وڑ کیسٹ آتا دور ئٹی ئسر دانا اسہ سوب دادے کہ مالو اوفتا خواری تیکن میوزک کمپنیک اوفتے گڑاس زر تسرہ ہرافتیان او زند ہم کننگ کریرہ و شونق آتے ہم برجا تخنگ کریرہ ولے داکان گڈ چندی تُو تا خواری تیان پد ہراتم اوفتا ایلبم اس رہلیز مسکہ تو اسہ بندغ آن شیئر مُستی گدرینگسہ مچ بنوکاتسکان سر مسکہ ہرانا سوب آن آخر کمپنیک ہم پیسہ تننگ آن نمن مسر، و شعر پاروکاتا حوصلہ غاک ہم کھٹہ مریسہ کریر۔

عمران فریق پارے کہ دا خیال بس کہ او ہرا وڑ ءِ، ہرا کسرے ہرا دا فنکار آتا شونق ءِ ہم تازہ تخے و ننا میوزک ہم مُستی کائے اندا سوچ اٹی دا کسر مونا بس کہ ہرا وڑ ایلو جہانی آرٹسٹ آک Music distributor آتا کمک اٹ تینا شعرتے مونا اتنگو ہمون گام نن ہم ارفن۔

او آن لائن شینکاری نا فائدہ تا بابت پارے کہ دا شعر آک ہراتم میوزک ایپس یا اسٹور آتیان بننگرہ گڑا دانا اسٹریمنگ آ ہمو فنکار اکن گڑاس پیسہ بریسہ کیک یعنی میوزک اسٹورز آک اوفتے زَر ایترہ۔ داڑان دا مریک کہ شئر پاروکاک تینا خواری تیکن گڑاس داد ہلنگ کیرہ۔ ایلو جوانی دادے کہ دا میوزک اسٹریمنگ آتا کوالٹی شئر تا سفائی داخہ در زیات گچین ءِ کہ داڑے شئر بننگ نا اسہ جتاؤ چَس ئسے۔

مسٹمیکو کل آن بلا جوانی دادے کہ دا میوزک ایپس آتیا ریلیز مننگ آن مست Music Distributor ہر شئر نا جاچ ءِ ہلیک، او اُرک دا دہن مالو کاریم اٹ ہتنگانے یا نہ، دانا ریکارڑنگ صافے یا نہ، دا پین ئسے نا شئر ئس تو اف، دانا میوزک پین میوزک تروک ئسے نا تو اف دا کل گڑاتے ہننگ آن گڈ او نا شئر ءِ ارفک۔ دانا فائدہ دادے کہ ننا فنکار آک ذگر ءُ گڑا مونا ہتور، او براہوئی میوزک ءِ مُستی دریسہ اسہ ہند اس ایتور۔

یاتی مرے وسیم عالم نا دا شئر 150 ایپس آ شینک مرو۔ بڑز پن کروک ایپس آتیا شئر شینک مسونے و ایلو ایپس آتیا شئر ءِ بننگ کن ودار کروئی تمو۔

بلوچستان ئٹ بنوکاک Anghami، Deezer و Jiosaavn آن اسٹ اس انسٹال کیر۔

کرونا وائرس نا کیس آک دے پہ دے آن زیات مننگو۔ اندن مستونگ نا بھلا جیل ٹی ام کرونا وائرس تالان مسونے ۔

مستونگ نا بھلا جیل ٹی دا وختا 24 بندی اریر۔ ارافتے آن  9 بندی کرونا ناجوڑی نا آماچ مسونو۔ دا وختا تیوی مستونگ ٹی کرونا وائرس نا ناجوڑ آک 170  ءُ۔ گدرینگوک آ اسے ہفتہ ٹی 22 بندغ آن زیات ٹی کرونا وائرس نا ناجوڑی پک مسونے۔

خبر نا ردٹ بھلا جیل مستونگ ٹی بند مروکا بندی تا کرونا وائرس نا ٹیسٹ کننگا اراڑے  24 بندی آن 9 بندی ٹی کرونا وائرس پک مس ۔

جان جوڑی محکمہ نا پاننگے کہ 24 بندی تا ٹیسٹ آتے نن فاطمہ جناح ہسپتال آ راہی کرینن اراڑان 9 قیدی ٹی دا ناجوڑی پک مسونے۔ ایلو تا رپورٹ دائسکان بتنے ہرا زوت برور۔

جان جوڑی نا محکمہ مونی پارینے کہ مستونگ ٹی 623 بندغ نا ٹیسٹ کننگانے ہراڑان 170 بندغ ٹی دا ناجوڑی پک مسونے۔

بنجائی وزارت تعلیم اسکول آتے ملنگ نا بابت صوبہ غاتیان سلہ ہلنگ نا خواست کرینے۔ اسکول آتے ملنگ ملپرنگ نا گڈیکو فیصلہ بین الصوبائی وزراء کانفرنس ٹی کننگ مریک۔

صوبہ غاتے پاننگانے کہ وہ 23 جون اسکان خوانندہ جاہ آتے ملنگ نا بابت تینا سلہ آتے ننے آ راہی کیر، اوٹی خوانندہ غا چنا و استاد آتے کرونا ناجوڑی آن بچفنگ نا بابت اقدام آتے اندا پلان نا بشخ جوڑ کیر۔

بنجائی حکومت نا پارہ غان 2 جولائی آ بین الصوبائی وزراء کانفرنس بٹننگانے اندا کانفرنس ٹی اسکول آتے ملنگ نا یا مونی بند تخننگ نا بابت فیصلہ مرو۔

یاتی مرے دا وختا کرونا وائرس نا سوب آن تیوی پاکستان ٹی اسکول و کالج آک بند ءُ۔ حکومت نا پارہ غان گڈیکو نوٹفکیشن ٹی 15 جولائی اسکان اسکول و کالج آتے بند کننگ نا فیصلہ کننگانے۔ ایلو پارہ ہائیر ایجوکیشن کمیشن بھلا خوانندہ جاہ (یونیورسٹی) تیٹی آن لائن کلاس النگ ںا فیصلہ ارفینے او کہی یونیورسٹی تیٹی آن لائن کلاس آک مننگو۔

ولے آن لائن کلاس آتا فیصلہ نا خلاف بلوچستان و مسکوئی فاٹا نا خوانندہ غاک و خوانندہ غاتا تنظیم آک برانزی مچی کننگو ہرا دائسکان برجاء۔ج

جون ٹینتھ نا حق ئٹی دپ درشانی، مخلوق مارٹن لوتھر کنگ نا یاتگار نا مونہ ساڑی ءِ۔

‎نسل پرستانہ رویہ غاتیا تالان آ سوچ و پولیس نا بے دادی نا ایسری کن خواست آتے منیفنگ نا حق ئٹی برجاء دپ درشانی ایسری ہفتہ ٹی امریکہ نا بھاز شار آتیٹ برجاء، ہراٹی روڈ آتیا مخلوق دپ درشانی کرے۔

‎دا ملک گیر برانز 25 مئی آن برجاہ ءِ، ہرا وختا افریقی امریکی جارج فلائیڈ وسط امریکی شہر منی ایپلس ٹی پولیس نا دزگیری نا وختا مرگ نا گواچی مس۔

‎اوار، دافتان گڑاس دپ درشانی جون ٹینتھ ہڈتروک آتیا تالان ئسر، دا جلوس 19 جون 1865ء نا یاتگار ئٹی کشینگک، اندن ٹیکساس نا جنوب وسطی ریاست ٹی ایسری افریقی امریکی تے غلامی آن آجوئی تسوسر۔

‎دا جلوس ملک ئنا یکہ انگا شار آتیٹ و بھاز خلق آتیٹ ایسری ہفتہ غا کشنگا، ہرافتیٹ نیو یارک، لاس انجلیس و میامی اوار ءُ۔

‎دا دپ درشانی واشنگٹن ٹی ہم مننگے، اندن وائٹ ہاؤس نا مونا بھاز آ دے تیان برانز مننگ ءِ۔

‎جمعہ نا شام وائٹ ہاؤس آن 3.2 کلومیٹر نا مُری آ جڈیشری اسکوائر آ برانز کننگا ہرانا نیام اٹی دپ درشانی کروکاک کنفیڈریٹ جنرل، البرٹ پائیک نا بت ءِ بٹیر۔

‎کنفیڈریٹ یاتکار جنوبی ریاست آتا علامت ءِ، ہرا امریکہ آن امو وخت یکہ مننگ نا حق آٹی ئس ہرا وخت او افریقی امریکی تا غلامی ءِ اڈ تننگ نا کوشست ٹی سرسوب مس۔ زوت ئنا سال آتیٹ نا وختا دا چیدہ ئس مسونے، خاص وڑ ئٹ ساڑی دپ درشانی نا وختا۔

‎نسلی امتیاز نا خلاف دپ درشانی ہفتہ نا دے ایلو ملک آتیٹ ہم کننگا۔

‎فلائیڈ نا کہنگ آن گُڈ برطانیہ ٹی نسلی امتیاز نا خلاف برانز ءِ اینو چار ہفتہ مسونے۔ اسکاٹ لینڈ نا شہر ایڈبنرگ ٹی مروکا دپ درشانی کروکاک ہژدہ سال نا سیاست دان، ہینری دنداس نا بت ءِ مر کننگ نا خواست کریر، ہرافک غلامی نا اسیری کن کوشست آتیٹ ایسری چم آتے کاریم ٹی ایسوسر۔

‎فرانس ٹی، دپ درشانی کروکاک نسلی امتیاز و پولیس نا بے دادی نا خلاف پیرس ٹی دپ درشانی کننگانے، دا برانز سیاہ فام بندغ آتا حق اٹی کننگا ہرا فرانسیسی پولیس نا دو آن یا مشکوک حالیت ئٹ مرگ نا گواچی مسونو۔

مہاجر آ تا جہانی دے آ اقوام متحدہ نا ذمہ وار آتا پاننگ ءِ کہ کرونا وائرس نا جہانی دین نا سوب آن غٹ جہان ٹی مہاجر آک بدحال ءُ و اوفتا ویل آک مہالو آن زیات مسونو۔ لکھ آ مہاجر و بے اُرا انگا بندغ آ تا جانجوڑی نا بنماسی آسراتی تا کمبوتی غٹ جہان کن اسے ویل اس جوڑ مسونے۔

اقوام متحدہ نا مہاجر آتا ایجنسی نا پاننگے کہ دا وخت مست آن بھاز بندغ آک بے وطن مسونو و مہاجری ٹی زند ءِ گدریفنگو۔

ادارہ نا اندازہ نا رِد ئٹ، 69.5 ملین بندغ بے دادی نا سوب آن بے جاغہ مسونو۔ اوفتیان  30 ملین مہاجر ایلو اندننگا ملک آ تیٹی باہوٹی مسونو ہراڑے زرگزرانی حالیت مہالو آن بد ءِ و جانجوڑی نا بنماسی آسراتی تا کمبوتی ءِ۔

جہانی جانجوڑی نا ادارہ ئنا جنرل ڈائریکٹر  نا پاننگے کہ ہرا حالیت آ تیٹی مہاجر آک زند ءِ مونی دننگ ئٹی ءُ، دانا سوب آن اوفتا جانجوڑی خطرہ ٹی ءِ و اوفک کرونا وائرس آن زیمی مننگ کیرہ۔

اوتا پاننگے کہ دا زند ئنا بنماسی آسراتی تیان مُر ءُ۔ جاگہ، دِیر، کُن خر و جانجوڑی نا بنماسی آسراتی تیان بے مراد ءُ۔ دا مہاجر کیمپ آ تیٹی کرونا نا دین نا تالان مننگ نا گمان بھاز زیات ءِ، ہراڑان جہانی جانجوڑی نا ارادہ ءِ بھاز خلیس ءِ۔

مہاجر آ تیکن اقوام متحدہ نا ہائی کمشنر  فلیپو گرانڈی پائک کہ بھازا مہاجر آک کیمپ آ تیٹی افس و ہرا شار آتیٹی کہ توسنو، او مہالو آن کرونا وائرس نا گواچی ءُ۔

لاطینی امریکہ نا ہفدہ، ہژدہ ملک اٹی وینزویلا نا چہل لکھ بندغ باہوٹی ءُ۔ اندا وڑ افریقہ ٹی مہاجر آتا بھلو کچ ئسے۔ پاکستان و ایران ٹی لکھ آ مہاجر آک ءُ۔ دا حالیت آ تا سوب آن دا پاننگ مریک کہ دافک ہر وخت کرونا وائرس نا گواچی مننگ کیرہ۔

گرانڈی پارے کہ اودے دا بابت آ ہم خلیس ارے کہ کرونا دین دا غٹ آتا روزگار ءِ ہم پلانے۔ لاک ڈاؤن و ایلو خیالداری پابندی تا سوب آن دافتا بروکا گڈیکو آسرہ ہم بند مسونے و اوفک دا لائخ  ہم افس کہ تینا علاج اس کریفنگ کیر۔

مہاجر آتیکن اقوام متحدہ نا ہائی کمشنر مونی پارے کہ کرونا وائرس دا اُرپک کہ دیر ہندی ءُ بندغ ئسے و دیر مہاجر ئسے یا زوراکی ٹی بے اُرا مسونے، دا غٹ  ءِ الیک۔