بلوچستان نا ضلع قلات ٹی پین ہفت بندغ ٹی کورونا وائرس پک، مریض آتا تیوہ کچ 46 مس۔ کورونا آن زیمی بندغ آک اُرا ٹی رکھ، اندن مسہ بندغ جانجوڑ مسونو۔

گیشتری حوال آتا رد ئٹ میڈیکل سپرینٹنڈنٹ پرنس عبدالکریم خان ہسپتال قلات ڈاکٹر علی اکبر نیچاری ہیت کریسہ پارے کہ قلات پرنس عبدالکریم خان ہسپتال قلات ٹی دائسکان 235 بندغ نا کورونا ٹیسٹ مسونے۔ دائسکان 46 بندغ نا کورونا ٹیسٹ رپورٹ آک مثبت، اندن 141 بندغ نا رپورٹ آک منفی بسونو، اندن 48 نا رپورٹ آتا بننگ سلوک ءِ۔ ہرا بندغ آتا رپورٹ آک مثبت بسونو اوفتے ارا ٹی رکھ کننگانے۔

او پارے کہ ارا تیٹی رکھ کروک بندغ آتا حالیت خطرہ آن پیشن ءِ اندن ننا اوفتیتون حال احوال ہم ارے۔

او مُستی پارے کہ دائسکان مسہ بندغ ہرافک کورونا وائرس آن زیمی ئسر چانڑدہ دے قرنطینہ کننگ آن پد اوفتا کرونا کننگا ہرافک منفی بسر و اوفک داسہ پورہ جانجوڑ مسونو۔

او پارے کہ ضلع قلات ٹی دائسکان کورونا دین نا گواچی بندغ آتیٹی اسے بندغ اس ہرا اسسٹنٹ کمشنر منگچر وکیل کاکڑ ئس ہرا کہ کرونا آن جنگ کریسہ شہید مس۔ ایلو ہرافتے ٹی کرونا پک مسونے او کل ئنا حالیت خطرہ آن پیشن ء۔

او پارے ننتون ٹیسٹ کٹس آتا کمبوتی ءِ و پین ٹیسٹ کٹس آتا خواست ارے۔

‎بھارت ٹی کرونا وائرس نا کیس آتا جمعی کچ اسے حد اسکان مُسے لکھ مسونے، ہراڑان بھارت جہانی دین آن تیوی غا ملک آتیان زیات زیمی مروکا ملک آتا لڑ ٹی چارمیکو نمبر آ بسونے۔

‎غٹ جہان ئٹ کرونا وائرس نا رپورٹ مروکا کیس آتا ردئٹ بھارت دا وختا بیرہ امریکہ، برازیل و روس آن پدی ءِ۔

‎بھارت ٹی گدرینگوک آ 24 ساہت ئنا نیام اٹی کرونا وائرس نا 10 ہزار 956 پک مروکو کیس رپورٹ مسونے، ہراڑان گُڈ بھارت اٹی کرونا آن زیمی مروکا بندغ آتا کچ اِرا لکھ 97 ہزار 535مسونے ۔

‎تدوکا 24 ساہت ئنا نیام اٹی بھارت ئٹ کرونا وائرس نا سوب آن 396 بندغ مرگ نا گواچی مسونو، ہراڑان گُڈ جہانی دین آن بھارت ٹی بیران مروک آک ہشت ہزار 498 مسونو۔

‎یاتی مرے کہ امریکہ ٹی کرونا آن ناجوڑ مروک آک 20 لکھ 22 ہزار آن زیات ءُ ۔ برازیل ٹی ہشت لکھ 28 ہزار، اندن روس ٹی پنچ لکھ آن زیات کیس ءُ۔

‎بھارتی حکومت نا اسے پالیسی ٹہیفوک ادارہ ئس ‘نیتی آیوگ’ نا باسک ڈاکٹر وی کے کول دعویٰ کرینے کہ بھارت کرونا وائرس نا خلاف بھاز جوان کاریم کننگ ءِ، و او جہانی دین آن دا جنگ ءِ آلمی کٹو۔

‎او مونی پارینے کہ چین کرونا ءِ توننگ کن ہرا وڑ ء ارفے سوس ، امو وڑ ءِ بھارت ہم ارفینے ۔ ولے نتیجہ غاک چین آن جتا بننگو۔

داستان ءِ عرب، براہوئی مزحمتی ادب نا پنہ غا

نوشت: محبوب شاہ

دی بلوچستان پوسٹ

پدین آ چرک اٹ وطن نا پٹ و دامان تیٹ مرغن پتن آ مش تا رنگ رنگی آ چُک آک مرغن لخی آ کونج و بڑز انگا بالاد نا پیہن او زیبا غا چڑز آتا ولر آک جتا جتا بولی تیٹی سرونزی ءُ گٹ اسے تون شوکار و بانسری نا توار اٹ اسے آجو ءُ بال اسے آن پد اسے ویل و ڈکھ اس، اسے بے وسی ءُ چپی اس، مش تا باٹغ آ تالان کریسُر۔ وطن نا پلوا بدر آ سادار تا بے دید آ روح سور دیر نا ماس آ کہوک آ مچھی تیانبارت جل تا خڑک ہر پارہ غا چٹ الکوسر، سہیل آن مست وسمی او موسم اسے نا رند ات بدر آ ملک آتا کونج آک بے مٹ آ چڑز آک اسے گچین ءُ گٹ اسیٹی کوکو کریسہ تہو ءُ چرک نا چس اٹ مست ءُ سر اسیٹی آجو آ بال اٹ وطن آتا حوال ءِ اتیسہ جمری آ آسمان ءِ وہوکا جو کے، وطن نا کمپ آکے، وسم کریسہ وطن نا زیبائی ءِ تینا رنگ اٹ ودیفیرہ ولے بھاز زو ملکی حاکم آک وطن نا میر معتبر آک پخیر تیامبار کہ مدام دوک تا خیرات ہلنگ کن ٹال او بدر آ ملک آتا ازگار آک حوس آن پر شہزادہ غاک پیسہ نا شنکی ٹی تینا شکرا ءُ شکاری آ کچک ءُ توفک و دام تا کمک اٹ خانوادہ غاتا ٹولیک ٹکا ٹکاٹی دا معصوم آجو آ ساہدارتا پرہ غاکے دنز تسرہ۔ آجوئی نا حوال ائتوکاتا ٹپی ٹوری جونک یا تو پٹ او دامان آتیٹی تمارہ یا تہو آنا زباد اٹ نیم کسر آ بال اٹ دم تسرہ، ظالم آتا دام آن طوفک نا چرہ غاتیان، شکرہ و شکاری کچک آتا چانپول آن بچوک آک خرسی و جل تیان مر بے روح ءُ زند اسے تون پٹ آتیان پنی ءُ بال اسیتون تہاری آن مست تینے انسان تیان مر سرکریرہ دنکہ امن پٹوکا گوگو تینا ولر آن گم مرے، دنکہ تحفظ خواہوکا خونی شکاری تا دتری آ پنجہ غاتا خلیس آن بے روح آ چھپی سلوکا دیر آمبار غم تا رنگی آ داستانکے خسکیسہ تالان کے، دا ویل آن پد نہار تا دتری آ ہںورڈ آک بے جلو آن است آکے شرارہ آجوئی نا ولر نا۔ دا مظلوم بے وس آ مخلوق آ ہر مظلوم ءِ تڑس بریک ہراک تینا ظالم حاکم آتا ہڑدے نا لٹ کٹ آن ہڑدے نا ٹپی ٹوری جون تا دوبنگ آن شکاری کچک آتا سوخور خواجہ غاتا خوراک جوڑ مننگ کن سامراج نا کندوری نا کواب مننگ آن تینا نسل اے بچفنگ کن تینا چوری کے بیگوہ کننگ آن پد بے وس مریسہ تینا چُر چیل آکے تینا چکل آتا ہنین دیر کے تینا درخت آتا تیار آ برم ءِ تینا لاب کروکا خولم کے باوہ پیرئی آ ڈغار کے خیسن دسوکا دیارے تینا دڑد خور آ لمہ نا مہر ءِ، خواری کش آ باوہ نا خلق و خاہوت ءِ ورنائی نا زیبا غا مستی نا دے تے، زیبل آ سنگت آتا زیبل آ کچاریءِ، کُر و کچک نا ندارہ غاکے، اُچ آتا بگ آکے، دامان آ گدان نا قطارے، خسی و خاسن نا چس ءِ، خرود و خریش نا تریت ءِ گچین آ پال تا سمبارے، پدین آ درنگ آتا سیخا ءِ، سرونز و دمبورہ نا توارے، شول بانسری نا است چکوکا ندارہ غاکے، الیسہ بدر آ سادار تا ولر آتون مول انگا پیہن آ مون آتون خلیس آ است اٹ ڈول ڈول کینکس کریسہ چپ راستکا او بال اٹ تینا ساہ ءِ سوخور آ نہار تیان ولر اٹ اوار تینا او بیگانہ غاتا پیہن خنی تیان دعا نا رکھ اٹ توپ و تفنگ نا سیخا ٹی بارود نا گند اٹ سم تا شنکی ٹی پتی آ خار تار تیان جپسہ گام گام آ تفوک دام تیان بدر آ ہمو وطن تیا کارہ ہرا تیتون اوتا سیالی و سیالداری ارے ہراڑے کہ تین پتینی نا چرک چکیک ہراڑے کہ آجوئی نا بال آ رکھ اف۔

برجا ءِ۔۔۔۔

پاکستان ٹی کرونا ناجوڑی بھاز ترندی ٹی تالان مننگے۔ دا وخت اسکان 1 لکھ 25 ہزار 933 آن زیات بندغ دا ناجوڑی نا آماچ ءُ۔

نیشنل کمانڈ اینڈ آپریشن سینٹر نا پاننگ آن کہ دا وخت اسکان گدرینگوک آ 24  گھنٹہ ٹی 6397 کیس مونا بسونو۔ اندا وڑ 107 بندغ گدرینگوک آ 24 گھنٹہ ٹی بیران مسونو۔ دا دین آن دا وختسکان 40247 بندغ زہمی مسونو ۔

پنجاب ٹی غٹ آن زیات کیس رپورٹ مسونے ہرافتا کچ 47382 ءِ۔ سندھ ٹی 46 ہزار 828، خیبر پختونخواہ ٹی 15 ہزار 787، بلوچستان ٹی 7 ہزار 673، اسلام آباد ٹی 6699، آزاد کشمیر ٹی 534 و گلگت بلتستان ٹی 1 ہزار 30 کیس رپورٹ مسونو۔

یاتی دا وختا پاکستان ٹی وزیرک، اسمبلی تا باسک آک، سیاسی پارٹی تا ذمہ وار آک، ڈاکٹر آتون اوار ہر تپہ غان چندی بندغ آک دا نا جوڑی نا سوب آن بیران مسونو۔

منظوربلوچ نا خوا

نوشت: ظفر معراج | مَٹ: سمیہ بلوچ

دی بلوچستان پوسٹ

بھازا سال آتیان گُڈ مستونگ آن اسہ جوان ءُ حوال ئس بِننگ کہ رسینگا۔ این اے – 267 مستونگ آن منظور بلوچ نا سرسوبی۔ منظور بلوچ نا مالی حالیت ءِ اونا موٹر سائیکل آن خننگ کیرے، ہرادے اگہ او سودا کننگ خوائے گڑا اخس او ووٹ (25738) ہلکونے، کس ئس دانا چارک نا کچ ہم اونا موٹر سائیکل نا نرخ ءِ خلپ۔ اسہ غریب سیاسی باسک ئسے نا سرسوبی آن بیرہ مستونگ نا پن آ لگوکہ دہشت گردی نا تومت آتیٹ دیخس کمی بسونے، بلکن گچین کاری نا دعویٰ آتے ہم سینہ بڑز کننگ نا وار رسینگا۔ ولے دا سرسوبی تو اوار ہراڑے خوشی نا ہنینی ءِ اموڑے پریشانی نا بارنی ہم منظور بلوچ نا جوڑ آتیا تالان ءِ۔ منظور بلوچ ہرا خوا ٹی دا تیوہ آ ووٹ آتے مُچ کرینے، اونا باریم بھاز کوبین ءِ۔ خوا ءِ ای اندا خاتر کاریم ٹی ایسٹ، کہ منظور نا قبیلہ ءِ مخلوق ہرا وڑئٹ اینو ہم دیر ئنا دوئی کننگ کن خوا تے ارفیسہ بھاز مر اسکا پند کیرہ، بلکن منظور بلوچ ہم اندن ووٹ مُچ کرینے۔ پاش ءُ ہیت ئسے، وام نا چاہ ءِ کنوکا اسہ بندغ ئس سجی نا تئوش ئٹ مجلس کننگ کریکہ یا سختی تیتون تینا پڈ ءِ پُر کروکا اونا ہمکوپہ غاک سُو برنج نا دیگ تے ٹلانگفسہ مچی ہڈ تننگ کریرہ۔ اندا خاتر منظور بلوچ نا بوٹ آک و اونا موٹر سیکل نا حالیت 10 آن 12 ہزار مربع کلومیٹر نا علاقہ ٹی اسہ اسہ درغ ءِ ٹکیفسہ پین بدحال مس۔

راست کہ بلوچستان نیشنل پارٹی نا ٹکٹ اونا جیب ئٹی ئس و اختر مینگل نا سرداری نا دستار اوڑا سیخا کروک ئس ولے بی این پی نا وسائل و اختر مینگل نا رواج آتیان چَپ سرداری، ہڑتوما امو خوشکابہ نا وڑ ئٹ ءُ، ہرا نا ڈغار پِر ئنا دیر کن کسر اُروک مریرہ۔ ولے پِر و خرسی ہراڑے، تدوکا اخس سال آن دا ڈغار آ حبیب جالب تون اوار بیست کارندہ نا گور آک جوڑ مسونو۔ ہرا وخت اختر مینگل نا تینا میرات ٹی قبرستان ئٹ ردوک ءُ بوچ ارے گڑا او منظور بلوچ ءِ ہراکہ گونی تے پُر کریسہ تسکہ۔ اندا خاتر او تینا مون ئٹ سلوکا امیتوار آتے مقابلہ ٹی تینا منشور نا خوا ءِ ارفیسہ پیشن مس، ہرافتیان بھاز آ امیتوار آتا بابت دا تاثر ئس کہ اوفتے اُرا ٹی تولوک ہنین آ “دیر ئنا ٹینکر” سر کننگو۔

منظور بلوچ نا باسک آتیا ہرا خوا لڑونج ءِ، اوٹی پُر انگا ووٹ ہم امو دیر ئنا وڑئٹ ءِ، ہرا ٹی *جوہڑ نا زراغ، درنگ، سنگریزہ، لڈخی، سلوکا دیر ئنا خرینی و دیخس گند ہم اوار مریک۔ ہرا اسہ مَٹ ءُ چاڑی اسیٹ پاکالنگ آن گُڈ کننگ نا لائخ مریک۔ اندن شش اُمیت آک، آسرہ غاک، سوغند آک و خواست آک ہمو ووٹ آتیتون اوار منظور بلوچ ءِ ہم مینڈیٹ ٹی رسینگانو، ہرافتا تا باریم ءِ ارفیسہ او اسہ چاڑی ئسے کن کسر اُروک ءِ۔

دا شش ٹک انت ءُ؟ اہل سیاست و ریاست ءِ دائسکان دا زبانی یات مرور، کنے گنڈینگ نا خواست اف۔ ولے بلوچستان پدا مستونگ نا وڑ انگا جنگ زدہ علاقہ آ راستی نا وڑ ئٹ پاکستانی نیت تون تفنگ کہ دافتیا ساف آ نیت تو خوڑتی ٹی اوننگ بھاز المی ءِ، مستونگ ہرا جتائی دوست تخوک و مذہبی ترندی تخوک آتا اسہ گڑھ ئسے نا حیثیت ئٹ تینے آ اسہ خیسن ءُ گڑد لیک اس خلفینے، اوڑے ہندی مروک آتا اسہ ہم سردار، نواب، میر، معتبر آن بیدس پارلیمانی سیاست و جمہوریت آ جدوجہد کروک اسہ قوم پرست جماعت ئسے نا غریب ءُ کارندہ ئسے پارلیمنٹ آ رادہ کننگانے، گڑا دادے بیرہ حساب نا جمع منفی نا پلو ٹی شاغِنگ اسہ راہ بند، قانودی، زیبا و چپ ءُ برانز ئسے آن مون ہڑسنگ مرو۔

منظور بلوچ ءِ رسنیگوکا ووٹ آتیٹ مننگ کروک وڑ ئٹ بیگواہ بندغ آتا ڈُک آن خلوکا خائوت، سنگت آک و سیال آتا ووٹ آک ہم اوار ءُ۔ ہرافک دھرنا و لانگ مارچ نا برانزی مچی آن بیدس منظور بلوچ نا وڑ ئٹ پارلیمان نا درغ ءِ ٹکیفینو۔ دافتیٹ ہمو بندغ آتا ووٹ ہم اوار ءِ، ہرا سیاسی گوجالنگ، لڑد گچین کاری و مینڈیٹ نا دزنگ اندن انگا بدگمانی تا دیوال آن درکسہ پولنگ اسٹیشن آتا درغ آتیا بسر سلیسر۔ اوفتیٹ ہمو بندغ آتا ووٹ ہم اوار ءِ، ہرافک سنگلاخ آ کسر تیا تینا ارنگوکا نت تے گریسہ دا اومیت آتیٹ چِر آتے جوڑ کریسہ سلیسر، کہ سی پیک نا خوش بروکا نعرہ گواچن آ دروشم اٹ اوفتا بروکا زنک آتا بخت ءِ بدل کرو۔ دا ووٹ آتیٹ افغان مہاجرین کنا باریم ءِ ارفوکہ ہمو ڈول آ کوپہ غاک ہم اوار اسر، ہرافتا مہمانداری ءِ داسا تینا مہمان آتیان کشنگ ناخلیس ارفنگ ءِ۔ امو بیلٹ پیپر آتا امو غریبی نا خلوک گِدانیک مش تیان دڑنگدہ مہر آتے خلکر، ہرا سیندک و ریکوڈک آن الیس گوادر اسکان ساحل و وسائل آن پُر مننگ آن بیدس اینو اسکان دیر و اِرغ نا پٹ و پول ئٹ در پہ در ءُ۔

دا گچین کاری تیٹ منظور بلوچ نا ہمکوپہ ہمو بے روزگار، خوانندہ ورناک ہم تینا بوٹ آتے ٹپنگ ئسر ہرافتا گلہ شونی ءِ کہ اوفتیکن ٹہیفوک روزگار تا شش فیصد بشخ نا اِرغ نا چنکو باخوس ہم ایلو تا باہ ٹی شاغنگسہ ءُ۔ و اوفتا زی آ دا تومت ہم کہ گڑاس زر اکن او “ایلو تا” کارندہ جوڑ مریرا۔

امیت، آسرہ، تغ و سوغند نا ووٹ آتا دا بھلن کبین خوا بیرہ منظور بلوچ نا کوپہ تیا اف بلکن آغا حسن بلوچ، احمد نواز بلوچ، اختر حسین لانگو، و ثنا بلوچ نا وڑ انگا نیامکو تپہ نا سیاسی کارندہ آک ہم قومی و صوبائی اسمبلی نا باسک مننگ نا حیثیت ئٹ اندن خوا ارفینو اختر مینگل نا پد ئٹ سلیسنو۔ خدا نا پن آ دافتے تول ئنا کچ و کیل آن جتا تخیسہ اُربو، اگہ نم گواچنی بدلی ہتینگ خوائرے۔

ٹیچر ایکشن کمیٹی کیچ نا شازیہ، فوکل پرسن غلام نبی و ایلو باسک آک پریس کانفرنس کریسہ پارینو کہ اگست 2019 ٹی بھلا تا خواننگ نا محکمہ، بلوچستان سروس رولز آن چپ بغیر پٹ و پول آن ضلع کیچ نا 114 استاد ءِ کشسہ خاہوت آتے ارغ نا محتاج کننگا۔

اوفتا پاننگ ئس کہ دا استاد آتیٹی بھاز آک زالبول ءُ و زیات اندن ءُ ہرافک بیست، بیست و پنچ سال آن تینا کاریم ءِ کننگ ئسر۔ منٹ اس ریٹائرمنٹ آن خڑک ئسر و دافتیٹی اِرا استاد کذیت کریر و اِرٹ استاد کشنگ آن مست ریٹائر مسونو بلکن اسے استاد سسپنشن آن بیست دے پد کذیت کرے اودے کہنگ آن شش تو پد کشار کریر۔

اوفک پاریر کہ داڑان صاف پاش مریک کہ کشنگ ٹی روزگار آتا قانودی و راہبندی آ وڑ ڈول و ضوابط آتے تینا کننگتن ءِ و محکمانہ سروسوج و پٹ و پول آتے آن بیدس اشتافی ٹی کشنگ نا عمل مسونے اندا سوب آن قانودی آ خواست آتے پورہ کریسہ کل استاد آک دمدستی تون اسیکہ وا نوکری تیا تخنگر۔

بلوچستان نیشنل پارٹی نا بنجائی راہشون نوابزادہ حاجی لشکری تینا اسے مذمتی بیان اسیٹی پارے کہ تربت ڈھنک واقعہ ریاست کن شرمندگی نا ہیت ئسے ڈھنک واقعہ نا خلاف برانزی و مچی آن اُلس نا غصہ مون آ بننگ آ ریاست و اونا نظام آ بے باوری ئسے۔ توفک و کارڈ نا طاغت آ مسلط مروکا طاغت آتا خلاف اسے جاہ مریسہ ام و ایمنی ٹی سیاسی جدوجہد نا رد ئٹ دافتے باہ تروئی ءِ۔

او تینا بیان ٹی مونی پارے کہ دا اُست پرغوکا واقعہ ٹی کرن آتا عزت دار آ روایت آتے لتاڑوکا بندغ آک نفرت کننگ نا لائخ ءُ۔ اُلس نا دا نظام آ بے باوری آن پد ریاست نا دا نظام ءِ چلیفوکہ بندغ آتے دا ہیت ءِ سرپد مروئی ءِ کہ ظلم و بیدادی و نا انصافی نا نظام ءِ خلیفنگ نا رد ئٹ زیات مونی توننگ کپسہ۔

او مونی پارے کہ بلوچستان نا سیاسی کارکن آتے تینا ذات ءِ غٹ نا ذات کن قربان کریسہ بلوچستان ٹی روایت پرغوکا آ طاغت آتے باہ تننگ کن اسے جاہ مریسہ امن و ایمنی ٹی سیاسی جدوجہد ٹی تینا کڑد ءِ برجاء تخر۔

ڈھنک واقعہ غا صوبہ غا قوضہ مروکا گروہ ءِ تاریخ نا مون آ ورندی تروئی مریک۔

بلوچستان اسمبلی ٹی متحدہ اپوزیشن خواست آتا حق ئٹی 10 جون آ وزیر اعلیٰ ہاؤس نا مونا برانز مظاہرہ نا پڑو ءِ کریسہ پارینے کہ خواست آتا پوروی متو گڑا خلقت تون اوار دپ درشانی کرون۔

 گیشتر حوال آتا رد ئٹ دوشمبے نا دے اپوزیشن لیڈر ملک سکندر خان ایڈووکیٹ نا صدارت ئٹ بلوچستان اسمبلی ٹی متحدہ اپوزیشن نا مروکا اجلاس ٹی بلوچستان نیشنل پارٹی نا پارلیمانی لیڈر ملک نصیر شاہوانی، پبلک اکاؤنٹس کمیٹی نا چیئرمین اختر حسین لانگو، پشتونخوا ملی عوامی پارٹی نا پارلیمانی لیڈر نصر اللہ زیرے، حاجی محمد نواز خان کاکڑ، حمل کلمتی و اصغر علی ترین اوار ئسر۔

اجلاس ٹی پی ایس ڈی پی 2020-21 نا بابت شابیتی تون جاچ ہلنگا۔ و داڑا است ہسونی نا درشانی کننگا کہ متحدہ اپوزیشن صوبائی حکومت آن برجاء خواست کننگ ءِ کہ پی ایس ڈی پی نا رد ئٹ اپوزیشن ءِ اعتماد ٹی ہلینگ، تیوہ غا حلقہ غاتیٹ دیمروی  فنڈز آتے برابری نا بنماس آ بشخنگ ءِ یخینی کننگے ولے حکومت نا کنڈان برجاء بے حسی و بے پامی نشان تننگسہ ءِ، اینو اپوزیشن لیڈر وزیراعلیٰ تون حوال کرے گڑا او اجلاس اسیٹ گٹ ئس۔ دنکہ متحدہ اپوزیشن تینا آئینی و قانودی حق نا دوئی کننگ کن جدوجہد نا فیصلہ کرینے، متحدہ اپوزیشن تینا آئینی و قانودی حق نمائندگی کن پبی جدوجہد و دپ درشانی آن دو بڑز کپرو۔

اوفک پاریر چار شمبے 10 جون آ متحدہ اپوزیشن برانز کرون و دپ درشانی دے ئنا 11 بجہ آ بلوچستان اسمبلی آن مرو ہرا وزیراعلیٰ ہاؤس آ ہنو۔ کورونا وائرس نا دین ئنا سوب آن دپ درشانی تروک مری تا رد ئٹ مرو، و تیوہ غا خیالداری نا وڑ و ڈول آ عمل کننگو۔

اجلاس ٹی پاننگانے کہ متحدہ اپوزیشن نا اسہ دپ درشانی ئس 19 مارچ آ ٹیفینگاسس، داسا ہم اگہ ننا خواست آ عمل متو گڑا بیوس مریسہ خلقت تون دپ درشانی نا پڑو کرون۔