ضلع کیچ نا علاقہ گورکوپ ئٹ درو شام نماز نا وخت آ اسہ ترند ءُ تراک اس مس، ہرانا سوب آن ہفت بندغ ٹپی مسر، ہرافتیان اِرٹ بھاز ٹپ مننگ نا سوب آن ساہ تسر۔

ہندی حوالکار تا ردئٹ تراک ہموتم مس ہراتم منہ ورنا علاقہ نا اسہ میدان ئسے آ گوازی کننگ ئٹ اختہ ئسر۔

ٹپی آتا چاہنداری غلام نا مار علی، دوستین نا مار شہباز، محراب نا مار نصیر، دلمراد نا مار جمیل، حمید نا مار جمال، اقبال نا مار برکت و غلام علی نا مار وزیر نا پِن تیٹ مسنے۔ پن کروک غٹ بندغ آتا تعلق اسہ خاہوت ئسے آن پاننگک۔

ٹپی آتے بنائی جانجوڑی کمک تننگ آک پد چار بندغ ءِ بھاز ٹپی حالیت ئٹ کراچی آ دننگا، واہم کسر ئٹ اِرا بندغ ساہ تسر۔ ایلو ٹپی آتا درمان برجاء ءِ۔

ہندی حوالکار آتا دعویٰ ءِ کہ دا تراک اسہ مارٹر گولہ ئسے نا ترخنگ آن مس، ہرا پاکستانی لشکر نا پارہ غان خلنگاسس۔

ہندی بندغ آتا پاننگ ءِ کہ پاکستانی لشکر نا کیمپ آن علاقہ ئٹ کیہی گولہ غاک خلنگار ہرا جتا جاگہ تیا تمار۔

بلوچستان ئٹ شام ئنا برجا سلہہ بند جلہو آتا لہر بلوچستان نا رکھوک حالیت ءِ بد کرینے، جتا انگا ضلع آتیٹ پاکستانی فورسز، پولیس چیک پوسٹ، سرکاری ڈٹ بندی، حوالکاری ٹارو و تنصیبات آتے کیہی جلہو آتیٹ ٹک کننگانے اندن کیہی علاقہ آتیٹ کسر تفنگ، سنگر ہلیسہ جلہو کننگ، و جاسوسی ازباب آتے ہم بھس کننگانے۔

دا جلہو آک 9 جولائی نا نن بناء مسر و 10 جولائی نا نن اسکان اسہ ڈول برجاء مسر ہرافتیٹی خاران، کیچ، سبی، جھاؤ، نصیر آباد، خضدار، قلات، مستونگ، کوئٹہ، کوہلو، و ایلو ضلع آک اوار ءُ۔

کیہی علاقہ تیٹ داسکان ہم سلہہ بند بندغ آتا ساڑی مننگ و کسر تفنگ نا حوال آک بننگ ئٹ بریسہ ءُ۔

شابیتی حوال تا رد ئٹ پنجگور ئٹ قلم چوک آ ٹہیفوک پاکستانی لشکر نا چوکی آ سہب ئنا یانزدہ بجہ غا سلہہ بند بندغ آک جلہو کریر۔ خاران ئٹ پد مہ پد مُسہ جلہو مسر ہراڑے پاکستانی فورس نا کارندہ، ملٹری انٹیلیجنس نا دفتر و گواش روڈ آ ٹہیفوک ایف سی چوکی ءِ جلہو آتیٹ ٹک کننگا۔

سبی کرمو وڈھ، دوسا لاشاری و پھاٹک آ چوکی تون اوار پلازہ نا کیب فورسز چیک پوسٹ آتیا جلہو کننگانے۔ جھاؤ نوندڑہ کولنج، گزی، داروکوچہ و ڈولنجی ئٹ فوجی کیمپ و یوفون ٹاورز آک جلہو آتیٹ ٹک کننگار۔

کیچ نا علاقہ گورکوپ، مند، سری گڈگی، بل بگور، نیامی کلگ، جوسک و تمپ نا ہند آتیا چوکی و کیمپ آتے ٹک کننگا و کیہی ہند آتیا مارٹر گولہ خلنگا۔

قلات نا علاقہ کپوتو، توک، مرجان، منگچر و دشت گوران ئٹ پاکستانی لشکر نا چیک پوسٹ، موبائل ٹاور، فورسز آتا گاڑی و تنصیبات آتیا جلہو کننگا۔ کوئٹہ ئٹ سونا خان، ہزار گنجی، کرانی روڈ آ چیک پوسٹ آتے ٹک کننگا اندن کوئٹہ تون گنڈوک مستونگ نا علاقہ دشت ئٹ چیک پوسٹ و سیکریٹریٹ نا بس آ جلہو مس۔

نصیر آباد و صحبت پور ئٹ لوہی، ساسولی، چھتر و شہنشاہ نا ہند آتیا پولیس چیک پوسٹ آتے ٹک مسر۔ خضدار وڈھ پلی مس و دراکالہ ئٹ بنجائی کیمپ و نہادی آ مڈی تے دروکا گاڑی تیا جلہو مس۔

دالبندین ئٹ گیس دروکا گاڑی تیا سلہہ بند بندغ آک جلہو کریر، بلیدہ ئٹ یو بی ایل بینک نا ماڑی بن تننگا، خاران ئٹ سی پیک لنک روڈ و لتاڈ ئٹ ایف سی چیک پوسٹ آک جلہو آتیٹ ٹک مسونو۔

نن ئٹ بناء مروکا دا سلہہ بند جلہو آتیٹ کیہی ہند آتیا پاکستانی لشکر نا کارندہ غاتا مرگ ئنا گواچی و ٹپی مننگ نا حوال آک رسینگانو، اندن بھلو کچ اسیٹ مالی نسخان ہم مس، فورسز نا پارہ غان ڈرون و جاسوس کیمرہ غاتے کاریم ئٹ ہتنگا ہرافتے جلہوکار آک ٹک کریسہ بھس کریر۔

بلوچستان نا صوبائی حکومت نا پارہ غان کیہی علاقہ آتیٹ جلہو آتے پک کریسہ پاننگانے کہ سیکیورٹی نا بحالی کن گام ارفنگسہ ءِ، سیکیورٹی فورسز آک کیہی علاقہ آتے بند کرینو و جوابی کاروائیک ہم برجاء ءُ۔

واہم ایسر حوال آتے اسکان کیہی علاقہ آتیٹ کسر تے تفنگ، اسنیپ چیکنگ و ٹریفک نا بندی برجاء ءِ ہراڑان شاری تے ترند سختی تون مون تِس ءِ۔

یاتی مرے کہ درے ننکان بلوچستان لبریشن فرنٹ “آپریشن بام” نا پڑو ءِ کریسُس تنظیم نا ترجمان میڈیا ئٹ شینک کروک چنک بیان اسیٹی پارینے کہ جلہو آتا لڑ برجاء ءِ شابیتی حوال آتے آپریشن نا ایسری آ شینک کننگو۔

اندا نیام ئٹ بلوچ لبریشن آرمی نا پارہ غان سوراب نا علاقہ گدر ئٹ پاکستانی لشکر بنجائی کیمپ آ جلہو کریسہ کوزہ ئٹ ہلنگا، علاقہ ئٹ سر مروک فورسز آتا ٹولی تے اِرا جلہو ئٹ ٹک کننگا۔ بی ایل اے ترجمان جیئند بلوچ نا رد ئٹ جلہو آتیٹ جمعی ڈول ئٹ 18 پاکستانی کارندہ مرگ ئنا گواچی و جھڑپ آتیٹ بی ایل اے نا اسہ سرمچار اس شہید مس۔

اندن اسہ پین بیان اسیٹی بلوچستان لبریشن فرنٹ نا ترجمان پارینے کہ “آپریشن بام” نا 80 درسد مسخت دوئی کننگانے، و آپریشن برجاء ءِ۔ دا آپریشن نا ردئٹ دائسکان تیوہ بلوچستان ئٹ ہفتاد آن زیات سرسہب جلہو مسنے۔

او پارے کہ دا آپریشن ئٹ بلوچ سرمچار آک ریاستی تنصیبات، فورسز، و پاکستان نا اقتصادی مفاد آتے ٹک کرینو۔ ترجمان پارے کہ غٹ کاروائی تا شابیتی حوال آک پدان میڈیا غا شینک کننگور۔

بلوچ سلہہ بند گل آتا پارہ غان قلات، تربت و ڈیرہ مراد جمالی ئٹ پاکستانی لشکر آ جلہو کریسہ ٹِک کننگا۔ دا جلہو تیٹ پاکستانی لشکر جانی نسخان ارفوئی تما۔

قلات ئٹ پاکستانی لشکر ءِ پد مہ پد بمب تراک آتیٹ ٹِک کننگا۔ ہرافتیٹ بم ڈسپوزل کڑدہ نا کاردندہ و ایلو کارندہ غاتے ٹِک کننگا۔ اندا وخت ڈیرہ مراد جمالی ئٹ پولیس آ بمب تراک اس مس ہراٹی مسہ کارندہ نا ٹپی مننگ نا پَک ءِ کوالخواک کریر۔

درو بیگہ نا وخت قلات ئٹ مسٹمیکو جلہو کننگا ہراٹی پاکستانی لشکر نا پوسٹ ءِ سلہہ بند بندغ آک ٹِک کریر۔

قلات و تربت ئٹ جلہو تا ذمہ واری ءِ بلوچ لبریشن آرمی ارفے۔ تنظیم نا ترجمان جیئند بلوچ میڈیا ئٹ تینا بیان ءِ شینک کریسہ پارے کہ ننا سرمچار آک قلات و تربت ئٹ 4 جتا انگا جلہو آتیٹ پاکستانی لشکر نا فوج ءِ ٹک کریر۔ دا جلہو آتیٹ آئی ای ڈی و مون پہ مون سلہہ بند جلہو آک اوار ءُ۔

ترجمان پارے کہ بلوچ لبریشن آرمی قلات نا علاقہ مکئی ئٹ جوہان کراس نا خڑک پاکستانی لشکر ءِ اِرا آئی ڈی جلہو ئٹ ٹک کرے۔ سرمچار آک اولیکو جلہو ئٹ بمب ڈسپوزل اسکواڈ نا ٹولی ءِ ہمو وخت ریموٹ کنٹرول آئی ای ڈی جلہو ئٹ ٹک کننگا، ہرا وخت اوفک کسر ءِ صاف کننگ ئٹ گھٹ ئسر ، جلہو نا نتیجہ ئٹ اسہ کارندہ اس مرگ ئنا گواچی و اِرٹ ترند ٹپی مسور۔

ترجمان پارے کہ ہمو وخت سرمچار آک ہمو ہند آ کوزہ گیر فوج ئنا پند کروک کارندہ آتے اسہ پین ریموٹ کنٹرول آئی ای ڈی جلہو اسے ئٹ ٹک کننگا ہرا نا نتیجہ ئٹ کوزہ فوج ئنا پین اِرا کارندہ مرگ ئنا گواچی و اسٹ اس ٹپی مس۔

او پارے کہ بلوچ لبریشن آرمی نا سرمچار آک درو شام نماز نا وخت قلات نا علاقہ مورگند ئٹ کوزہ گیر پاکستانی فوج نا کارندہ غاتے ہمو وخت اسنائپر جلہو ئٹ ٹک کریر ہراتم او تینا پوسٹ نا خڑک راشن دننگ کہ سر مننگ ئسر، اسنائپر جلہو ئٹ کوزہ گیر فوج نا اسہ کارندہ اس ہند آ مرگ ئنا گواچی مس۔ اندا وخت آ سرمچار آک کوزہ گیر لشکر نا پوسٹ آ بھلا سلہہ تیٹ جلہو کریر و گرنیڈ لانچر ئٹ کیہی گولہ تے خلکر ہرانا سوب آن دژمن ءِ گیشتر جانی و مالی نسخان تیتون مون تروئی تما۔

بلوچ لبریشن آرمی نا ترجمان پین پارے کہ بی ایل اے نا سرمچار آک اتوار نا نن تربت نا علاقہ گھنہ ئٹ کوزہ گیر پاکستانی لشکر نا گاڑی تا ٹولی ءِ سنگر ہلیسہ جلہو ئٹ ٹک کریر۔ کوزہ گیر فوج نا اِرا گاڑی جلہو نا گواچی مسور اندن ایلو کارندہ غاک گاڑی تے ارفیسہ نرار۔جلہو نا نتیجہ ئٹ کوزہ گیر فوج نا کم و ود اِرا کارندہ مرگ ئنا گواچی و کیہی ٹپی مسور۔

ڈیرہ مراد جمالی ئٹ پولیس آ جلہو نا ذمہ واری بلوچ ریپبلکن گارڈز ارفے۔ بی آر جی نا ترجمان دوستین بلوچ میڈیا ئٹ بیان ءِ تینا شینک کریسہ پارینے کہ بی آر جی نا سرمچار آک درو نا دے بلوچستان نا علاقہ صدر تھانہ ڈیرہ مراد جمالی نا ہند قدیر کوٹ نا خڑک ہائی وے آ کوزہ گیر پاکستانی پولیس نا گاڑی ءِ ریموٹ کنٹرول بمب ئٹ ٹک کریر۔ تراک نا نتیجہ ئٹ کوزہ گیر پولیس نا مُسہ کارندہ ترند ٹپی مسور۔

بلوچ یکجہتی کمیٹی (بی وائی سی) نا بنجائی راہشون تے انسداد دہشت گردی نا عدالت (اے ٹی سی) ئٹ ہتنگا، ہراڑے عدالت اوفتے پین دہ دے اکن پولیس نا دوٹی تننگ نا پرمان تس۔ دزگیر بندغ آتیٹ ڈاکٹر ماہ رنگ بلوچ، صبغت اللہ شاہ جی، بیبرگ بلوچ، غفار بلوچ، گلزادی بلوچ و بیبو بلوچ اوار ءُ۔

پولیس عدالت ءِ پارے کہ دوبہ دار آتا برخلاف دہشت گردی نا دوبہ تا ردئٹ کیس خلوک ءِ، ہرافتا سر و سوج کن پین وخت بکار ءِ۔ عدالت پولیس نا خواست آ راہشون تے دہ دے نا ریمانڈ آ پولیس ءِ تس۔

خیال ئٹ مرے راہشونک مُسہ توہ مُست 3 ایم پی او (مینٹیننس آف پبلک آرڈر) نا ردئٹ دزگیر کننگاسر، و اینو اندا بابت جج آتیا تالان اسہ جائزہ بورڈ ئسے نا مجلس اس مروئی ئس۔

واہم مجلس آن منہ گھنٹہ مالو ناگمان آن ایم پی او نا پرمان آتے ایسر کریسہ اوفتے انسداد دہشت گردی نا عدالت ئٹ ہتنگا۔

بلوچ یکجہتی کمیٹی نا راہشون تا ردئٹ دا گام ”وختی آن مروک ڈٹ بندی“ نا سوب ئسے تانکہ راہشون تے دروغ نا مقدمہ تیٹ گٹ کننگہ۔ اوفتا پاننگ ءِ کہ اوفتا برخلاف مروک ایف آئی آر آک ”دروغ آ تالان“ ءُ و دافتا مسخت بلوچ سیاسی جہدکار آتے چھپ کرفنگ ءِ۔

تربت سول سوسائٹی نا کنوینر و سیاسی باسک گلزار دوست ءِ استو تربت نا ہند آپسر ئٹ اونا اُرا غان پاکستانی لشکر دزگیر کریسہ نادرست ہند آ درے۔

استو تربت آن پاکستانی لشکر نا دو تیان بیگواہی آن گڈ سیاسی باسک گلزار دوست مون آ ہتنگانے۔

خاہوت نا ردئٹ او سی ٹی ڈی نا دزگیر ئٹی ءِ، اونا زی آ سوختئی ودی کروک تران و پین کیہی کیس خلنگانے۔

یاتی مرے کہ بلوچستان ئٹ سیاسی و بندغی حق آتا تنظیم آک سی ٹی ڈی نا کاروائی تے شکبر گوندرہ، سی ٹی ڈی نا دو آن سد آتا کچ ئٹ بلوچ سیاسی جہدکار آتا دزگیری نا وخت خون و زوراکی ئٹ بیگواہی تیٹ اوار مننگ آ دا ادارہ ءِ بلوچ زنک ایسری ئٹ اوار مننگ نا پِن ءِ تننگسہ ءُ۔

گلزار دوست نا زوراکی ئٹ دزگیری آ سیاسی و چاگڑدی تپہ آتیٹ ترند بے جاراتی و خلیس خننگ ئٹ بننگ ءِ۔ جتا انگا تپہ غاک گلزار دوست نا دمدستی یلہ کننگ و اونا رکھنگ ءِ باوری جوڑ کننگ نا خواست کرینو۔