بلوچستان نا ضلع واشک آن سرکاری کمکار ٹولی نا بندغاک برام آن برامی ءِ تینتون دریسہ بیگواہ کریر۔
حوالکار آک ٹی بی پی ءِ پاریر واشک نا علاقہ راغے شنگر آن سرکاری کمکار ٹولی آن تعلقدار زین جان‘ نور جان نا مار برام نا مجلس نا وختا برامی شبانہ عبدالاحد نا مسڑ ءِ بیگواہ کرے تینتون اوار درے اوڑان گُڈ اوفتا ہچ ءُحوال اس رسینگتنے۔
یاتی مرے بلوچستان نا ایلو علاقہ تیٹ پاکستانی لشکر و ڈھکوک ادارہ تیکن کاریم کروک سلاء بند ٹولیک کاریم کننگو ہرافک ڈیتھ اسکواڈ پن ئٹ چاہنگرہ۔ اندن بلوچ سیاسی و چاگڑدی مخلوق نا پاننگے کہ اندا سلاء بند ٹولیک پاکستانی فوج و ڈھکوک ادارہ غاتا وارِسی نا دو آن ایلو ڈو تیٹ ہم اوار ءُ۔
اِرا دے مُست مشکے نا علاقہ قلات چیر آن پاکستانی لشکر نا کارندہ آک اُرا غا چھاپا ٹی اسہ بلوچ آزاتی دوست بندغ ئسے نا لمّہ ناز بی بی‘ پیر داد نا مسڑ ءِ دزگیر کریر۔
اندا دے ضلع کیچ ٹی بلوچ نیشنل موومنٹ نا راہشون ئسے نا اُراغا چھاپا نا وختا پاکستانی فوج نا کارندہ آک چنا زالبول تیتون بے دادی کریسر۔
تدوکا تُو اٹ ہم مشکے آن اسہ نیاڑی ئسے بیگواہ کننگا۔ ہمو نیاڑی نا اُرا والاک پک کریر کہ سرکاری کمکار ٹولی یعنی ڈیتھ اسکواڈ نا بندغ آک، شہباز خان نا مسڑ ءِ تینتون دریسہ بیگواہ کرینو۔
اُرا والاک خلیس نا درشانی کریسہ پاریر کہ ڈیتھ سکواڈ والاک ننا مسڑ نا برام ءِ زورٹ تینا کارندہ سیتون کرور۔
دا واقعہ غاتا بابت سرکار نا کنڈان ہچ اس پاننگتنے۔ اندن داڑان مست ہم دننگا واقعہ آتیٹ بلوچ سیاسی و سماجی مخلوق ڈیتھ اسکواڈ نا اوار مننگ نا تومت خلکُنو۔
حوال آتا رِد ئٹ اندا دے آ کیچ بلنگور نا کیبنگا علاقہ دشت جتانی بازار آن پاکستانی لشکر و ڈھکوک ادارہ تا کارندہ آک چھاپہ خلیسہ 9 بندغ ءِ دزگیر کرینو۔
فوج نا دو آن بیگواہ مروکا بندغا تیٹ رحمت‘ خدا داد نا مار، صدام‘ رحمت نا مار، چاکر‘ عبدالصمد نا مار ، عبدالحمید‘ محمد اسحاق نا مار، بخشی‘ سید نا مار، جمعہ‘ احمد نا مار، نیاز‘ شمبے نا مار ، رحم دل‘ شاہ مراد نا مار و مختار‘ خان محمد نا مار اوار ءُ۔
یاتی مرے بلوچستان ٹی بیگواہ بندغ تا ویل دے پہ دے خراب ءُ دروشم اسیٹی بننگے۔ سیاسی گل تا کنڈان بیگواہ بندغا تا یلہ کننگ کہ بلوچستان و پیشن مُلک آتیٹ برانز ہم ارفنگسہ مسونے۔ اندن بیگواہ بندغ تا مخلوق نا کنڈان ہنوکا 10 سال ءِ پرامن برانز ہم برجاہ ءِ۔
