بلوچستان نا بنجاہی شار کوئٹہ نا علاقہ شریف آباد کلی قمبرانی ٹی اسہ ورنا اس، عبدالحامد نا مار محمد فیضان قمبرانی ءُ استو پاکستانی لشکر ارا غان دزگیر کریسہ بےڈس ءُ جاگہ سے آ درینو۔

خاہوتی وسیلہ تا رد ئٹ محمد فیضان ءِ نن نا 3 بجہ غان پد ہمو وخت ارفنگا ہراتم سلہہ بند بندغ آک اوفتا رہینگوک جاہ غا سر مسر۔

خاہوت نا تا پاننگ ئسک کہ کاروائی ٹی پاکستانی ڈکوک ادارہ، سی ٹی ڈی، ایف سی و ایہن پچ بنوک بندغ آک ساڑی ئسر۔

خاہوت نا پاننگ ئسک کہ محمد فیضان نا دزگیری نا رد ئٹ ہچو وارنٹ اس تننگتؤ و نئے کہ اوفتے دا پاننگا کہ اودے انت دوبہ ئسے ٹی دزگیر کننگ ٹی ءُ۔ تدینی آن ہد خاہوت ئٹ بھاز خلیس خننگک کہ خاہوت ہمو جاگہ نا سروک آتیان زوت محمد فیضان نا جاگہ نا پاشی و کانودی حیثیت ءِ پاش کننگ نا خواست کرینو۔

خاہوت بندغی حق آتا گل آتیان خواست کرینے کہ دا تدینی آ غور کیر و مارکو نا یلہ کرفنگ کن عملی کڑد اس سر ایتر۔

بلوچستان نا ضلع خضدار ئٹی زوراکی ئٹ بیگواہی نا تدینی اس مون آ بسونے و ہراڑے عبدالقدوس زرکزئی و اونا ہفتدہ سال نا مسڑ اقصیٰ ءِ پاکستانی لشکر نا کارندہ غاتا پارہ غان دزگیر کننگ آن پد بے ڈس ءُ جاگہ اس دننگا۔

وسیلہ تا رد ئٹ 5 اگست نا نن دہ بجہ نا وخت خضدار نا سول کالونی نا اسہ رہینگوک کوارٹر ئسے آ سی ٹی ڈی نا و سول وردی بنوک بندغ آک اوار کاروائی کریسہ جلہو کریر، کارندہ غاک ارا ٹی پترینگ آن نیاڑی و ایلو بندغ آتے خلیفیر، اوفتے ٹک کریسہ لٹ کٹ کریر و ارا ٹی پٹ پول کریر۔

کاروائی نا وخت عبدالقدوس زرک زئی و اونا ہفتدہ سال نا مسڑ اقصی ءِ تینتون دریر۔ کارندہ غاک نئے دزگیری نا سوب اس پاریر و نئے کہ کانودی کاروائی یا مقدمہ ئسے نا باروٹ معلومداری تسر۔ خاہوت نا پاننگ ءِ دا ہڑتوما تے دننگ آن پد اوفتا باروٹ ہچو حوال اس تننگنگ اف و نئے کہ دا پاننگانے کہ اوفتے ہرا جاگہ غئے دننگانے۔

زیمی مروک آ خاہوت بندغی حق آتا گل، وکیل، سیاسی گل و لس مخلوق آن خواست کرینو کہ اوفک دا کسہ نا زیہا غور کیر و عبدالقدوس زرک زئی و اونا مسڑ اقصیٰ نا سرسہبی ئٹ یلہ کرفنگ کن تینا کڑد ءِ سر ایتر۔

اسما جتک کیس

 ٹی پی بی سرگپ

بلوچستان نا ضلع خضدار نا ہندی اسما جتک، ہرادے فروری 2025 ئٹی سانگ تفرنگ نا سوب آن برمتہ کننگاسس، پوسکن تالان مروک ویڈیو ئسے ٹی قرآن مجید دوٹی تینا برمتہ کننگ نا زموار آتا برخلاف انصاف نا خواست کریسہ خننگک۔ واہم ویڈیو نا تالان مننگ آن منا گھنٹہ پد اونا باوہ ماسٹر عنایت اللہ ءِ نادرست سلہہ بند بندغ آک خضدار ئٹی کسفیر۔

دا تیوہ غا کسہ ٹی بنجاہی دوبہ دار ظہور جمالزئی پنی ءُ بندغ ئسے پاننگنگ ءّ ہرادے ایف آئی آر ئٹی ہم ہنی کننگانے۔ ہرانا زی آ اسما جتک نا برمتہ نا دوبہ ہم ارے کہ او دائسکان دزگیر کننگ متو۔

ماسٹر عنایت اللہ نا خون ئنا تدینی آ بلوچستان اسمبلی ٹی برانز مون آ بس۔ یونس عزیز زہری بلوچستان اسمبلی نا دیوان ئٹی پارے کہ اسما نا وڈیو تالان مننگ نا ارا گھنٹہ غان پد اونا باوہ ءِ کسفنگا، او دا ہم پارے کہ اسما جتک نا برمتہ نا برخلاف توار بڑز کروک آ بھاز آ بندغ آتے ٹک کریسہ کسفیر، مولانا ہدایت الرحمان پارے کہ برمتہ و خون ئٹی اوار بندغ آک نواب ثناءاللہ زہری نا کارندہ غاکو و اوفتا کاٹم آ ہندا نا دو تخوکے۔  ہندا سوب آن  حکومت اوفتا مون آ بے وس ءِ۔

بلوچستان ئٹی کیہی سال تا سے راجدوست و بندغی حق آتا زیہا کاریم کروک آتا پارہ غان دا ڈوبہ خلنگانے کہ بلوچستان ئٹی سلہہ بند ٹولیک سریام چست ءُ ہرافتے لس بولی ٹی ” ڈیتھ اسکواڈ” پارہ۔ دا ٹولی تے ریاستی ادارہ تا پارہ غان سلہہ، پن و سیبو تننگک۔

راج دوست ٹولی تا خیال ءِ کہ دا سلہہ بند ٹولی تے بلوچستان ئٹی برجا راجدوستی نا تحریک نا برخلاف پاکستانی لشکر و ڈھکوک ادارہ غا تا سروکی ٹی جوڑ کننگا و دافتے ریاستی ادارہ تا پارہ غان پورہ کمک دوئی ارے۔ ڈیتھ اسکواڈ نا کاریم بلوچستان ئٹی بیرہ سیاسی کارندہ و جہدکار آتے ٹک کننگ اسکان سلتنو بلکن دافتیا برمتہ کننگ، ٹیک مننگ و دزی کننگ و پین چاگڑی گندہی تیٹی اوار مننگ نا دوبہ ہم خلنگک۔

دا ٹولی تے داڑسکان پن و سیبو ارے کہ پولیس و ایلو ادارہ غاک ہم دافتا برخلاف کاروائی کننگ آن پد ہنوکو۔ اگہ پولیس دافتا برخلاف کاروائی کیک ہم تو فوج یا ڈھکوک  ادارہ تا نیام تمنگ آن دزگیر مروک بندغ آتے یلہ کرفنگک۔ دا سلہہ بند ٹولی تے اسہ ہندنو جان خلاسی اس دوئی ءِ کہ دا بیدس خلیس آن تینا کاریم تے برجا تخانو۔

بلوچستان نا نگیگ حالیت و سلہہ بند ٹولی تے ریاستی مخ تفی نا وڑ انگا پالیسیک مالؤ آن خراب انگا حالیت آتے پین ہم بدحال کرینو۔ دا پالیسی تا زیم آک بیرہ سیاسی و سیکیورٹی تا حد اسکان افس بلکن پورہ چاگڑد ءِ تینا پلویڑ ئٹی ہلکنو۔ اسہ کش بے ایمنی، بھیم، رکھ مفرنگ و بے باوری لس اولس نا زند ءِ تَنگان کرینو۔

ارجنٹائن نا پنی آ فٹبال گوازی کروک لیونل میسی نا باوہ و مسکوہی ایجنٹ جورج میسی 68 سال نا عمر ئٹی کذیت کرے۔

جہانی میڈیا نا رپورٹ آتا رد ئٹ جورج میسی اُرے آن ناجوڑ ئسک و جمعہ نا نن ارجنٹائن نا شار روسایو نا اسہ جانجوڑی مرکز ئسے ٹی کذیت کرے۔ اونا خاہوت ہم اونا کہنگ نا احوال ءِ پک کرے۔

جورج میسی تینا مار لیونل میسی نا فٹبالی کڑد کیرئیر ئٹی بھلو کڑد اس سر تس، او میسی نا بنائی کیرئیر آن اودے اریسہ کریکہ و بھلو وخت ئسے اسکان اونا ایجنٹ ہم رہینگا۔

رپورٹ آتا رد ئٹ میسی نا باوہ تینا زند ئنا گڈیکو تو تیٹ خاہوت تون اوار ئسک، لیونل میسی ہم اونا داروں درمان نا وخت ئٹی اوڑتون اوڑدہی کن روساریو آ ہناسس۔

جورج میسی نا کہنگ آن تیبہ جہان آن فٹبال گوازی کروک آتا دعا فاتحہ کن کلہو آتا ریسہ بنا کرینے، ہرافتیٹی میسی نا مسکوہی کلب بارسلونا، اونا چنک سنی نا کلب نیولر اولڈ بوائز و ارجنٹائن فٹبال ایسوسی ایشن ہم اوار ءُ۔

بلوچستان ناضلع چاغی نا علاقہ چھتر ئٹی نادرست سلہہ بند بندغ آتا پارہ غان امب آن پر پنچ مزڈہ ٹرک آتے تینا کوزہ ٹی ہلنگ نا تدینی مون آ بسونے۔

تدینی آن زرس پد سوشل میڈیا غا تالان ویڈیو اسیٹی سلہہ بند بندغ آک امب آتا پیٹی تے اولس آ بشخ و چانٹ آ ہم خننگانو۔

وسیلہ تا پاننگ ءِ کہ لاری تے ارا دے اسکان نوشکے ٹی رکھ پان کانوائے نا جوڑشت نا ودار ئٹی تورینگاسس، ہراڑان پد پاکستانی لشکر نا اواری تون لاری تے کاروان نا دروشم ئٹ رادہ کننگا۔

وسیلہ غاک پارہ کہ دا لاری اسہ ہندنو کانوائے ئسے نا بشخ ئٹی ئسرہ ہرادے ایف سی نا پارہ غان سیکیورٹی تننگنگ ئسرہ۔

تدینی آن پد ٹرانسپورٹر آک پاریر کہ لاری تے ارا دے اسکان نوشکے ٹی کانوائے نا جوڑشت نا پن آ تورنگا واہم ہراتم اوفتے سیکیورٹی تون اوار رادہ کننگا گڑا پدا ہم کسر ٹی سلہہ بند بندغ آک لاری تے دننگ ئٹ سرسہب مسر۔

زیمی مروک آتا خیال ئسک اگہ لاری تا ہن و بر ءِ سیکورٹی تا سوب آن کم کننگاسس گڑا دا پک مرے کہ سلہہ بند بندغ آک کاروان نا تہٹی لاری تے اسکان امر سر مسر و اوفتے تینتو دننگ ئٹ امر سرسہب مسر۔

ولے دائسکان ہچو گل ئسے نا پارہ غان دا کاروائی نا زمواری ارفنگتنے و نئے کہ تدینی نا ہین شابیتی حوال اس و سرکاری تران اس مون آ بسونے۔

بلوچستان نا جتا جتا انگا علاقہ غاتیان پاکستانی لشکر نا دو آن پنچ بندغ نا زوراکی ئٹ بیگواہی نا تدینیک رپورٹ مسنو و گوادر آن زوراکی نا آماچ ارا بندغ اسہ تو ئسے آن پد یلہ مسر۔

شابیتی حوال آتا رد ئٹ کیچ ئنا علاقہ بلیدہ غان 6 اگست 2026 نا سہب پاکستانی لشکر، ایف سی و ملٹری انٹیلیجنس (ایم آئی) نا کارندہ غاک مسہ بندغ ءِ اوفتا ارا تیان دزگیر کریسہ بیگواہ کریر۔ بیگواہ مروک آتیٹی حاجی نیک سال نا 18 سال نا مار یاسر، بشیر احمد نا 20 سال نا مار شے حق و طہور احمد نا 24 سال نا مار سیف اللہ اوار ئسر۔

یاسر و سیف اللہ بلیدہ نا علاقہ کورپشت نا ہندی ئسر، شے حق بلیدہ نا علاقہ ڈمبانی نا تولوک و خوانندہ اس ئسک۔ ہر مسٹ ءِ 6 اگست نا سہب مسٹ نیم بجہ غئے دزگیر کننگا ہراڑا پد اوفتا بابت ئٹ ہچو حوال اس مون آ بننگ کتنے۔

ارٹمی نیمہ غا کوئٹہ نا علاقہ موسی کالونی سریاب آن ہم ارا بندغ نا زوراکی ئٹ بیگواہی تا رپورٹ بسونے۔ عبدالماجد نا 19 سال نا مار مزمل ءِ 28 جوالائی 2026 نا سہب چار بجہ نا وخت آ اونا ارا غان، ایکان سلیم نا 17 سال نا مار جلیل ءِ ہفت اگست نا سہب شش بجہ نا وخت ارا غان دزگیر ککریسہ بیگواہ کننگا۔ ہڑتوما تے سی ٹی ڈی و ملٹری انٹیلیجنس نا کارندہ غاتا پارہ غان دزگیر کننگ و دننگ نا حوال رسینگانے۔

ایلو گوادر نا علاقہ پانوان جیونی آن 11 جولائی 2026 آ زوراکی ئٹ بیگواہی نا گواچی مروک ارا بندغ حبس نا مار محمد بلوچ و احمد نا مار اعظم بلوچ 7 اگست آ یلہ مسر۔ ہڑتوماتے اوفتا باوہ پیرہی آ علاقہ پانوان جیونی، گوادر آ یلہ کننگا۔

بلوچستان نا ضلع کیچ ئنا علاقہ مند ئٹی اسہ فوجی کاروان ئسے ٹک کننگا، سوراب ئٹی کوئٹہ کراچی کسر ئنا زی آ اسہ بھلو پول ئسے بنب تراک اسیٹی بھس کننگ نا حوال رسینگانے۔

ہندی وسیلہ تا رد ئٹ کیچ ئنا علاقہ مند ئٹی ریدیگ نا ہند آ اسہ ترند ءُ تراک ئسے نا توار مسونے، ہراڑان پد زوت علاقہ ٹی بھاز سمکاری ہم مس، حوال آتا رد ئٹ تراک ئٹی فوجی کاروان ئٹی ساڑی اسہ لاری ئسے ٹک کننگا ہراڑان لاری پورہ بھس مس۔

وسیلہ تا پاننگ ئسک کہ تدینی آن پد علاقہ ٹی سم کاری اسہ کش آ برجا ئسک، ایکان جانی نسخان مننگ نا حوال ہم مون آ بسونے، ولے کہوک یا ٹپی تا کچ ئنا رد ئٹ دائسکان ہچو حوال اس مون آ بتنے۔

ارٹمیکو نیمہ غا سوراب نا علاقہ مل شاہورائی ٹی کوئٹہ کراچی بھلا کسر نا زیہا اسہ پین پول ئسے ہم ترند ءُ تراک اسیتون بھس کننگانے۔

ہندی وسیلہ تا رد ئٹ تراک ئٹی پول ءِ سخت نسخان رسینگا و کسر نا زیہا ٹریفک نا ہن و بر زیمی مننگ نا خلیس ارے۔

دا تدینی ہندنو وخت ئسے غا مسونے کہ ہرا وخت بلوچستان نا جتا جتا علاقہ تیٹ سیکیورٹی نا بابت تدینی تیٹی ودوکی خننگ ئٹ بسونے، منا تو ئٹی بلوچستان نا فوجی کارندہ، پولیس و بھلا کسر تے ٹک کننگ نا کیہی تدینیک رپورٹ مسنو۔

ساؤتھ ایشیاء ٹیررازم پورٹل نا اوپن سورس ڈیٹا نا رد ئٹ جولائی 2026 ئٹی بلوچستان ئٹ 176 تدینی رکارڈ کننگانو ہرافتیٹی کل 438 بندغ کسکنو ہرافتییٹی 127 فوجی کارندہ اوار ءُ۔

جنوری آن جولائی 2026 نا وخت اسکان بلوچستان ئٹی 765 تدینی و 1600 کہوک ءُ ریکارڈ ئٹ بسنو۔ جلہو تا طرز آتیٹی ہم جتائہ خننگانے، ہرافتیٹی جند ندری بمب تراک، جپ کریسہ جلہو کننگ، اسہ وخت ئٹی کیہی جاگہ تیا ترند ءُ کاروائی، بھلا سرکاری مڈی ( تنصیبات) تیا جلہو و ڈرون آتا بکار کننگ اوار ءُ

بلوچستان نا جتا جتا انگا علاقہ تیان چار بندغ نا زوراکی ئٹ بیگواہی نا تدینیک رپورٹ مسنو ہرافتیٹی ارا چانڑدہ سال نا خوانندہ ہم اوار ءُ۔ خاہوت آتا رد ئٹ دا بندغ آتے پاکستانی لشکر نا کارندہ غاک دزگیر کننگ آن پد بیگواہ کریر۔

شابیتی حوال آتا رد ئٹ بلیدہ کورے پشت نا ہندی منصور انور ءِ 4 اگست 2026 نا نن 3 بجہ نا وخت پاکستانی لشکر نا کارندہ غاک اونا اُرا غان اودے خوائفیسہ تینتو دریر ہراکان پد او بیگواہ ءِ۔ خاہوت نا رد ئٹ منصور انور داکان مالؤ ہم نومبر 2023 ئٹی زوراکی ئٹ گواچی مسوسس و کم و ود ارا تو آن پد جنوری 2024 ئٹی یلہ کننگاسس

ارٹمیکو تدینی ٹی کوئٹہ نا علاقہ سریاب آن ارا چنک عمر ئنا خوانندہ مہراللہ بلوچ نا مار صفی اللہ و شیردل بلوچ نا مار مدثر بلوچ ءِ 24 جولائی 2026 نا سہب ئنا 5 بجہ غئے سی ٹی ڈی و آئی ایس آئی نا کارندہ غاک دزگیر کریر۔ ہڑتوما خوانندہ تا عمر 14 سال پاننگک۔

ہندا وڑ کوئٹہ غان سرور بلوچ نا مزوری کروک آ مار نجیب اللہ ءِ 7 جولائی 2026 نا نن 2 بجہ نا وخت اوفتا ارا غان سی ٹی ڈی و آئی ایس آئی نا کارندہ غاک ارفیر ہراکان پد او بیگواہ ءِ۔

یات سلے کہ بلوچستان ئٹی زوراکی ئٹ بیگواہی تا کیہی تدینیک رپورٹ ہم مفسہ و کیہی تدینیک ریاستی زورگیری، تڑی تننگ و ایلو سختی تا دو آن ارے آ مون آ بریرہ

بلوچستان نا ضلع خضدار، قلات، نوشکے، سوراب و تحصیل زہری ٹی کرفیو نا سوب آن زند ئنا دودینگ آک زیمی ءُ، ایکان کوئٹہ و تربت ئٹی پاکستانی لشکر نا سروک آتا پارہ غان سکیورٹی ہائی الرٹ تننگانے

شابیت حوال آتا رد ئٹ بلوچستان حکومت فوجی سروک آتا ہدایت ئٹ بلوچستان نا جتا جتا انگا بھلا شار تیٹ کرفیو یا سخت پابندی خلکونےو کوئٹہ ٹی سیکیورٹی ہائی الرٹ نا خاطران ریڈ زون ءِ سیل کننگانے۔

وزیر داخلہ بلوچستان شار آتیٹ کرفیو خلنگ نا میڈیا نا رپورٹ آتیان نمن مسونے، واہم ہندی جاگہ تیا انتظامیہ ءِ ہدایت تننگ نا حوال بسونے کہ او ننکان 6 بجہ آن مست دکان و روزگاری جاگہ تے بند کیر۔

قلات شار ئٹی سرکاری سروک آک شام مننگ تون دکان آتے بند کننگ و شار والا تے ارا تیٹی مننگ نا ہدایت کرینو، شار ئٹی پاکستانی لشکر نا بھلو کچ اس ساڑی ءِ و ہن و بر نا کل کسر تے بند کننگانے۔

قلات آن حوال آتا رد ئٹ پاکستانی لشکر شار ئنا کیہی بھلا کسر تیا کڈ ختانے و لشکر نا پارہ غان کوئٹہ کراچی نا کسر آ ہم کڈ ختنگ و ٹریفک ءِ تورنگ نا حوال آک رسینگانو۔

تدوک آ دے تیٹ خضدار ئٹی ہم نن ئنا 6 بجہ آن پد دکان مکان تے بند کننگ نا پڑؤ تننگانے، ہراکہ بروکا حکم اسکان برجا مرو۔

ہندا وڑ اینو تربت ئٹی سیکیورٹی خلیس نا سوب آن ایف سی و پولیس نا ودی بندغ پین شار ئنا جتا انگا جاگہ تیا اتنگانو، ہن و بر نا کل کسر تیا نگرانی و چینکنگ نا عمل پین ترند کننگانے، تربت ئٹی تدوکا کیہی دے تیان دفعہ 144 ہم خلنگوکے۔

بلوچستان نا بنجاہی شار کوئٹہ نا بلوچ علاقہ تیٹ پین گیشتر ایف سی نا کارندہ غاک خوائفنگانو، شار ئنا ریڈ زون ءِ پورہ سیل کننگانے۔

کوئٹہ ٹی درو پولیس سروک تھریٹ الرٹ تریسہ دعوی کریسس کہ بلوچ لبریشن آرمی نا چار ہزار جنگول شار ءِ ٹک کننگ کیرہ،واہم پدا حکومت نا سروک پولیس نا دا نوٹیفیکیشن آن میڈیا نا زیہا نمن مس۔

داکان ضلعی انتظامیہ سوراب ضلع ٹی سیکیورٹی حالیت آتا دو آن 6 اگست 2026 نا نن 6 بجہ غان 8 اگست نا سہب ئنا 6 بجہ اسکان کرفیو خلنگ نا پرمان تریسہ دکان و روزگاری جاہ تے بند کرینے۔

ضلعی انتظامیہ کل شار والا تے ہدایت تسونے کہ ہندا وخت آتیٹی سٹی ارا تیان پیشتمنگ آن پد کار و سیکیورٹی ایساوپیز آتیا سختی ٹی عمل کیر۔

داکان بیدس بلوچستان نا ضلع نوشکے و تحصیل زہری تدوکا کیہی تو تیان کرفیو تا گواچی ءُ، داکان ہنوکا تو تیٹ مستونگ نا علاقہ کھڈکوچہ ٹی ہم کرفیو خلنگاسس ہراکہ دائسکان برجا ءِ۔

کراچی نا علاقہ گلشن اقبال آن 5 اگست نا نن پاکستانی ڈھکوک ادارہ و رینجرز آتا دو آن زوراکی ئٹ بیگواہی نا گواچی پنچ بلوچ خوانندہ یلہ مریسہ سلامتی ٹی تینا ارا تیان رسینگار۔

بلوچ اسٹوڈنٹس ایکشن کمیٹی نا بنجاہی سروک ورنا تا یلہ مننگ ءِ پک کریسہ پارے کہ اظہر بلوچ، غوث بخش بلوچ، شہزاد بلوچ، انیس بلوچ و وسیم بلوچ ہرافتے 5 اگست نا نن گلشن اقبال کراچی آن پاکستانی لشکر، رینجرز آک زوراکی ئٹ بیگواہ کریسر، یلہ مریسہ سلامتی ٹی تینا ارا تیا سر مسر۔

بیان ئٹ پاننگا کہ پنچ انگا خوانندہ غا تا یلہ مننگ جوانو کاریم ئسے۔

گل بیان ئٹ پارے کہ پاکستانی لشکر نا دو تیان زوراکی ئٹ بیگواہی نا ٹک مروک آ ارا پین بلوچ خوانندہ خلیل بلوچ وزیر بلوچ دائسکان دزگیر ءُ و اوفتا باروٹ ہچو حوال اس ملنگ کتؤ۔

بلوچ اسٹوڈنٹس ایکشن کمیٹی پارے کہ بلوچ خوانندہ خُلیفنگ و زوراکی ئٹ بیگواہ کننگ نا ریسہ زوت آن زوت بند کننگے، ہچو خوانندہ ئسے داوڑ ئنا ترند ءُ سزا ئسے نا گواچی کننگپ۔

گل خواست کرینے کہ بلوچ خوانندہ تے خلیفنگ، تڑی تننگ وزوراکی ئٹ بیگواہ کننگ نا ریسہ زوت آن زور تورنگ مرے و کل خوانندہ تے سلامتی ٹی یلہ کننگے۔