وڈھ ئنا تدینی زوراکی تا ریسہ ۔ ٹی بی پی سرگپ

بلوچستان نا ضلع خضدار نا علاقہ وڈھ کلی یار محمد سونارو ئٹی ستمبر نا دہ تاریخ نا نن دہ بجہ نا وخت پاکستانی لشکر برامی ءُ ارا اسیٹی سم کاری کریسہ چار بندغ ءِ کسفے و نیاڑی تیتون اوار کیہی تے ٹپی کرے۔ ہراڑے شادکامی والا ارا ءِ مودہ ٹی بدل کننگا۔ تدینی نا برخلاف کہوک آتا خاہوت آک جون تیتون اوار کراچی و کوئٹہ نا بھلا کسر نا زی آ برانز کریر۔

بلوچستان ئٹی دا تینا ڈول ئنا نئے کہ اولیکو تدینی ءِ و نئے کہ دادے اسہ علاقہ اسکان نا تدینی پاننگ کینہ۔ اگہ بیرہ ہندا تو و ہنوکا تو ئٹی مروک آ تدینی تا جاچ ءِ ہلین گڑا قلات، مستونگ، نوشکے، سوراب و بلوچستان نا ایلو کل علاقہ تیان ہم دنو تدینی مون آ بسنو ہراڑے پاکستانی لشکر لس الس ءِ سم کاری کریسہ یا ڈرون، ہیلی و جنگی طیارہ تیٹ ٹک کرینے۔

دا کل تدینیک اسہ بھلو کڑمب و ریسہ ئٹ مروک ءُ حالیت ئسے نا گمان ایترہ۔ وڈھ ئٹی اسہ برام والا ارا ئسے آ سم کاری مرے یا کہ لس آباتی تے بالی گراب آتیٹ ٹک کننگ، وڑ ڈول جتا مننگ کیک ولے اونا پد ئنا بھس کاریک اسہ وڑ ءُ، خون کننگ، ٹپی آ بندغ آک، بھس مروک آ خاہوت و بھیم ئنا سیخا ٹی تدوک آ زند۔

دا حالیت بلوچ زنک ایسری نا اسہ مرغن ءُ ریسہ ئسے نا بشخ ءِ۔ ہراڑ تون تدوکا کیہی دہ یک آتا ءِ بلوچ راج مون تریسہ ءِ۔ وخت اتون اوار دا تادی تا مننگ نا طریقہ الم بدل مسنے، ولے دا نا زہم و نتیجہ ٹی ہچو بنداوی ءُ بدلی اس بتنے۔

پاکستان نا پارہ غان بلوچستان ئٹی طاغت نا وسیلہ یا ریاستی رٹ ءِ توننگ نا اسہ کش کوشست آتیان دا ہیت مرغن مریک کہ ریاست تینا ساڑی پالیسی و زوراکی تا وسیلہ ئٹ تینا ساڑی گری نا گڈیکو کوشست آتیٹ لگوک ءِ۔ دیہاڑ نا پنت دادے کہ طاغت نا زور آ پرنچنگوک آ توار آک اسل ہم ایسر مفسہ۔ او وخت اتون اوار پین ترندی و مہکمی ئٹ پدی بڑز مریسہ مون آ بریرہ۔

سنگت اینو ہلے نی تنیا  خدا ءِ تینا یاد کیو
یاد کیو اینو شھید آتا تینا تران ءِ یاد کیو

یاد کیو اینو درویش نا خن تا روشنائی ءِ یاد کیو
یاد کیو اینو ریحان نا جذبہ اسلمی آ صبر ءِ یاد کیو

ہلے کنے پتک ہلیو وطن نا غم ہشا کنے
ہشا کنے ہشا کنے وطن نا غم ہشا کنے

شان ایت نی کامی نی ہم اسلمی آ مار اس
ریحان نا کوپہ  اس نی لمہ شاری نا درد خوا اس

دک اس ایت داسا  نی دنکے تس فیضانی
حوصلہ بڑز بالاد نی دنکے اس سربازی

اوار تم شہناز تون سجدہ کر گودی  تے
مرید  نا نی خن مر تباہ کر  لونڈو تے

سنگت اینو ہلے نی تنیا  خدا ءِ تینا یاد کیو
یاد کیو اینو شھید آتا تینا  تران ءِ یاد کیو

کامی بلوچ

نن کسکونن، ننا ڈونڈ آ کرگز آک مچ ءُ

نوشتکار: جعفر قمبرانی

دی بلوچستان پوسٹ

پنی آ فلاسفی دان جان لاک پائک “ہراڑے کانود ایسر مریک، ہموکا زُلم بنا کیک”
انت دا گواچن اف کہ اینو بلوچستان ئٹی ہم راست، کانود، گواچن و راست پاروک آک اسٹ اسٹ آ زندان تا گواچی مریسہ مننگو؟
اگہ راست ءِ ڈکھنگ آن راست جاہیکہ ڈکھنگ مسکہ گڑا فرعون نا ارا غان موسی (ع)، نمرود نا خاخر آن ابراہیم(ع) و مچھی نا پڈ آن یونس (ع) پیش تمنگ کتؤرا۔

چٹ سفا ہندن اینو پاکستان نا کوزہ ٹی بلوچ راج ہتون اوار اونا دلیر آ بادوی کروک آ راہشون آک دنکہ ڈاکٹر ماہ رنگ، بیبو، گلزادی، یاسر جان و خضدار نا لُڈڑ آ مارکو آصف جان اریر ولے اوفتا فکر و است ئٹ ڈکھنگوک آ گواچن دے ٹک آنبار راج ئنا مون آ پاش ءِ۔

ہندن لمہ عائشہ فیض نا راست ءِ کیز کننگ نا کوشست ہم بے سہب خننگک کہ لمہ نا جند بھلے اخس زندان تا گواچی کننگے ولے ہمو گواچن زندان نا ہر دیوال و ہر درغ آن کوکڑو کریسہ راج اتون مون پہ مون مریسہ ءِ۔

ہاں آؤ، لمہ عائشہ فیض نئے کہ اولیکو ءِ نئے کہ گُڈیکو۔۔

ولے خرین آ ہیت دادے کہ موسی و نمرود نا دؤر آنبار لمہ عائشہ نا دؤر ئٹ ہم راست ءِ پہہ مروک بھاز ءِ ولے او ہم دؤر ئنا فرعون تا مون آ چھپ گنگ بے دوی ءُ۔

ہر اسٹ لیپ ئٹ کہنگ نا ودار کننگ ئٹی ءِ ولے وخت ئنا سامراج تون مون پہ مننگ س راست ءِ پیشخانڈیسہ ہمیش زندہ مننگ کن تیار کسس اف۔

اگہ راست پاننگ ڈکھنگ ئٹ تیوہ غا ریاست، ریاستی مشینری و ریاست نا سرفراز و ضیاء آنبار انگا تالی چٹ آک لگوک ءُ گڑا راست ئنا رکھ و گواچن نا پاش کننگ کن نن انت کرد سر تننگون۔۔۔۔۔۔؟
دا سوال اس افک، سوال زندہ غاتیان مریک
نن انت کڑد سر تننگون۔۔۔ بھاز لس ءُ ہیت ئسے۔۔۔
اگہ ہچ نئے گڑا نن کسکونن و ننا کونٹ آ کسس تولوک ہم اف۔
نن جہان ئٹ ہم افن س ننا ادیرہ ہم خالی ءِ۔
نن کیز ئٹی اُن و بلوچ کیزیک آزات چرینگرہ۔۔۔
ننے آن گیشتر زندان ئٹ لمہ عائشہ فیض و ایلو کل سنگت آک آزات بشخندہ ءُ۔

ننے آن ود کل شہید آک زندہ ءُ چرینگرہ۔۔۔
ولے نن کسکونن و ننا ڈونڈ آتیا سرفراز ضیاء علی مدت، ثناء زہری و مینا مجید کون انگا کرگز آک مچ ءُ۔

ھچ مگوش،
گُنگ ببو،
زُبان منی۔۔۔

ناجوڑ آ ڈیہہ ئنا طبیب ڈاکٹر لال خان (درّک)

نوشتانک : ساربان سبزل

دی بلوچستان پوسٹ

تہارمہ ءُ شام ئسے ٹی نن نیمہ نا پاس ءِ، وتاخ ئٹ منہ سنگت ساڑی اُن، ایلو سنگت آک تنظیمی کاریم اسیٹی سہب ئنا سر ہلکنو، ننا خنک گڑتی ٹی سنگت آتا کسر آ خلوک ءُ کہ دیچا ہراتم سر مریر، انت حال ئٹ مرور، خدا جان خیر و خوشی ٹی سر کے تا، وتاخ ٹی چپی اس تالان ءِ، ہنداڑتون موٹر سائیکل آتا توار اس مش تیٹی پنک، است آتا دریکہ زیات مریک و بے جاراتی ٹی خنک کسر آ خلوک ءُ کہ ہراتم مش تا ول تیان گدرینگسا سنگت آک کسر آن پاش کرور، خیر سنگت آک بریرہ سر مریرہ است آک گلان مریرہ، سنگت آک دم دروک ءُ، سلام و دعا غان پد دیر کنیرہ و احوال مریک گڑا سنگت آک احوال ہیترہ کہ خیر ئٹ تینا کاریم ٹی سرسہب مسونن۔

ساڑی آ سنگت آتیٹی خننہ کہ اسہ سنگت اس ہندنو ہم سنگت آتیتون اوار ءِ ہراڑتون مالو اوڑدہی متنن، گڑا سنگت تون درستی راستی مرینہ کہ دا زیبا غا ورنا ہرانا دروشم ءِ سیل کننگ آن خنک دم درینگپسہ درّک جان ءِ، او تیوہ غا نن پینگن ءُ کچاری اس مریک، اونا کڑمب انگا خیال آک ڈغار کن اونا است ئٹی دڑد آتے ہندن درشان کیرہ دنکہ اولیکو چنا نا ناجوڑ مننگ آ لمہ اس امر گنوکی ئٹ ڈغار ءِ کاٹم آ ہرفِہ، جنگ و تحریک ئنا زی آ گپ و تران کیک، تینا بے وس آ راج ئنا دڑد و خواری تے ہندن درشان کیک کہ دن محسوس مریک دا کل دڑد و خواری تے او تینا اسٹ انگا جون آ سگنگ ءِ۔ است آک دا کچاری ءِ کشکنگ کن ہچ کشپسہ ولے سنگت آک دم دروک مریرہ گڑا سنگت آک خاچرہ، ولدا دے آن درّک جان و سنگت اس موکل کیرہ کہ اودے تینا محاز آ ہنوئی مریک و پانہ کہ زند مس ولدا خنون تینے ولے اواری نا فلسفہ تینے ولدا خننگ نا ارمان نا دڑد آن است ءِ جارات ہیتک گڑا اواری ءِ۔

خیر اسہ دے اس سفر ئسے ٹی کسری ڈک لگنہ گڑا سلام دعا مریک، ہندا منہ ساعت ئٹی ہم او کنا پلو آ منہ راجی ءُ پنت تفک و رائی مریک۔ داکان پد کنے آ سنگت اس درک جان نا اسہ دے اس سلام اس سر کیک گڑا است ئٹی اونا مہر جاگہ کیک و اونا زیبا غا دروشم ءِ مارسا اوڑتون گدرینگوکا وخت آتے است آ ہتیوہ و مہر و خوشی ٹی سلام ءِ تا وعلیک کیوہ۔ وخت گدرینگسا کیک اسہ دے اس وتاخ ٹی کاریم تے شون تننگ مرینہ کہ سنگت اس نیٹ آن دڑوکا چہرہ تون ننا کنڈا برسا مریک، مر آن خننگ تون محسوس مریک کہ احوال اس است ءِ کشکوکو ہتنگ ءِ، سنگت پائک کہ درک جان ثابت قدم مسنے، ڈغار اونا مہر ءِ قبول کرسا تینا تیدار ءِ اونا خیسن آ دتر تیٹی سینگار کرینے۔ دا احوال ءِ بننگ تون کنے یکدم لگک کہ ای تغ ئسے ٹی اُٹ، دن امر مننگ کیک کہ اسہ سنگت اس منہ دے مالو کنا خنتا مون آ ئس ولے داسہ اوڑتون اوڑدہی مننگ کن کنے پین جہان ئسے ٹی گام تخوئی تمک۔ ہزار ارمان تیتون اودے است آ ہتینہ و گڈسر ئٹ گمر کرسا پانہ کہ شہید آک نمے سلام ءِ! اواری ءِ قربان!

تنظیم نا پارہ غان اونا تفصیل آک شینک مریرہ، گڑا ای اسہ کڑمب ءُ سوچ ئسے ٹی کاوہ، و تینتون پاوہ کنے داسہ سما تما کہ او داخس کڑمب ءُ خیال و پر دڈد ءُ است اس ہراکان ایسوسس، ڈاکٹر لال خان پنی آ گواڈخ ایم بی بی ایس نا زانت ءِ دوئی کریسس، تینا راج ئنا باتی تا ناجوڑی تے او تو ہڑدے تینا خن تیٹی خناسس، و الم ہندا دڈد مسنے ہرا اودے دا ٹک خلنگ آ بےوس کرینے کہ راج ئنا دڈد و ناجوڑی تا بنچخی سوب آک ہراڑے کڈ ءُ، ڈاکٹر چائسس کہ ناجوڑ و غلام آ لمہ ڈغار نا چناک ہم ناجوڑی تا گواچی مریرہ۔ دنکہ ننے سما ءِ کہ او طبیب اس ئس گڑا ڈغار نا ناجوڑی ءِ بسند کرسا اونا سوب ءِ ہم پٹا کہ قوضہ گیر پنی ءُ اوبا اس ڈغار و راج ئٹی تالان مسنے، گڑا دا ناجوڑی نا درمان ءِ پٹنگ کن او ازغندی و پورچنکی آ مش تیکن مون کیک کہ بیرہ ہموکان دا اوبا نا کہسفنگ کن دارو دو بریک و ڈیہہ و ڈیہہ ئنا باتی تا ناجوڑی تا درمان او بیرہ آجوئی ءِ پائک کائک۔

درّک، درّا، دّرین، در نجف

بے مٹ رنگ ئٹ دانہ لال ئنا

مستونگ نا باغ آک و ریاست نا  علمداری – ٹی بی پی سر گپ

منا دے مہالو بلوچستان نا شرہ ئی سر وزیر سرفراز بگٹی کوئٹہ ٹی مستونگ نا مخلوق کن خرین آ توار تون تران کریسہ پارے اگہ باغ تیان پاکستانی لشکر نا زی آ جلہو  کننگا گڑا باغ خواجہ تے جلہو کار تا دو ءِ سبک کروک تکنگو۔ سرفراز بگٹی نا رد ئٹ مستونگ نا اولس تون ارا کسر ءُ: ہمپ و لڈ کریسہ ‘آئی ڈی پیز’ مننگ کن تیار مریر یا گڑا اوفتا باغ تے کاٹ کریسہ چٹفنگو۔  دا بیان ہندنو وخت ئسے آ مون آ بسک کہ ہراتم بلوچستان نا گیشتر علاقہ تیٹ و بھلا کسر تیا سلہہ بند آزاتی دوست تخوک تنظیم آتا کاروائیک تیز مسنو۔ تینٹ مستونگ ئٹی ہم ہندا منہ ہفتہ و دا تو ئٹی پاکستانی لشکر آ پاش ءُ جلہو مسنو۔ داڑتون اوار حوال آتا رد ئٹ مستونگ و داپار ایپار ئٹی بلوچ لبریشن آرمی پبی پن ارفیسہ ءِ۔

مستونگ بلوچستان نا ہمو علاقہ تیٹی اوار ءِ ہرا بے کچ گچین ءُ جغرافیہ نا وڑٹ ارزشت تخوک ءُ ڈغار ئسے۔ دا کوئٹہ نا خڑک ئٹی ءِ و بلوچستان نا نیامیکو علاقہ تے اوار کروک آ کسر تیکن ہم بھاز اہمیت تخک۔ بلوچستان نا شرہ ئی آ سروزیر سرفراز بگٹی نا پارہ غان مستونگ نا اولس ءِ باغ آتے چٹفنگ یا ہمپ لڈ کننگ نا تڑی تننگ بیرہ اسہ ہندنو بیانیہ اس افک بلکن دا بلوچستان ئٹی ریاست نا ہمو پالیسی تا درشانی تے کیک کہ ہرافتا وسیلہ ئٹ سیکیورٹی نا بے سہبی تا باریم ءِ اولس نا کوپہ تیا بٹنگ نا کوشست کننگک۔ حکومت وار وار آ بلوچستان ئٹی تینا رٹ ئنا مننگ نا دعویٰ کیک ولے ریاست رٹ علمداری بیرہ کسر تیا فوجی تا مننگ، چیک پوسٹ خلنگ یا بھلو سلہہ تیٹ جوڑ مفک۔

بلوچستان ئٹی برجا آزاتی نا تحریک اسہ رد مفروک ءُ گواچن ئسے۔ ریاست نا جوڑ کروک آ پالیسیک، اسہ کش ئٹ لشکر کشی، بالی طاغت  تا استعمال، دزگیری، چھاپہ و طاغت نا وسیلہ غاک دا شاہدی ایتے کہ ریاست دا تحریک ءِ نزور کننگ یا بے پن کننگ ئٹ بےسہب مسونے۔ اگہ حکومت دا تکک کہ باغ آتے بھس کننگ آن سلہہ بند تنظیم آتا کاریمک سلیرہ، گڑا سیکیورٹی نا رد ئٹ دا چٹ چنکو سوچ ئسے نا درشانی کیک۔ اینو باغ آک اریر، پگہ مشی ءُ علاقہ اس مننگ کیک، ایلوزدے اسہ خالی ءُ ماڑی اس، ہندن کسر اس، بازار یا کہ بھلو آباتی والا علاقہ اس۔ انت ہر ہمو جاگہ بھس کننگو ہراکان سلہہ بند کاروائی اس مننگ کیک۔۔۔؟