بلوچستان ئٹی زوراکی ئٹ بیگواہی تا چرجوئی برجا ءِ۔ پنجگور و شال آن اِرا بندغ ءِ بیگواہ کننگ نا حوال مون آ بسونے، پنجگور نا ورنا اس منہ تو آن پد یلہ مس۔

حوال آتا رِد ئٹ امداد بلوچ نا 16 سال نا مار حسنین امداد ءِ ، ۲۱ اگست ۲۰۲۶ نا شام ۵ بجہ غا پنجگور نا بس اڈا نا کیب آن پاکستانی لشکر نا کارندہ غاک دزگیر کریسا بیگواہ کریر۔

ایلو نیمہ غان علی مراد نا مار 23 سال نا مار نصیب اللہ بلوچ کلی سردار کاریز، دے کیہی بائی پاس شال نا رہینگوک و دکاندار، ءِ ۲۸ جولائی ۲۰۲۶ نا دے سہب ئنا ۴ بجہ غآ اُرا غان تا فوجی کارندہ غاک دزگیر کننگ آن پد بیگواہ کریر۔

محمد یاسین نا مار یحییٰ ، سلیمان بازار پروم، پنجگور نا باتی، ہرادے ۱۶ مارچ ۲۰۲۶ نا دے بیگواہ کننگا سس، ۲۴ اگست ۲۰۲۶ آ پروم، پنجگور آن یلہ مس۔

بلوچستان ئٹی زوراکی ئٹ بیگواہی تا برخلاف وائس فار بلوچ مسنگ پرسنز نا کوالخواہی ٹی کوئٹہ پریس کلب نا مون آ ہڈ تروک برانزی کیمپ ۶۳۳۸ میکو دے ہم برجا۔

جنید حمید و یاسر حمید نا خاہوت آک برانزی کیمپ ئٹ ساڑی مریسہ پاریر کہ جنید ءِ ۸ اکتوبر ۲۰۲۴آ حب و یاسر ءِ ۱۱ اکتوبر ۲۰۲۴ آ قلات آن ریاستی ادارہ تا کارندہ غاک دزگیر کریسہ زوراکی ئٹ بیگواہ کریر۔ ہڑتوماتا باروٹ دائسکان معلومداری تننگ ئٹی افس، ہرانا سوب آن خاہوت بھاز بے جاراتی و فریشانی تا گواچی ءِ۔ اوفک حکومتی سروک آتیان خواست کریر کہ اوفتا بیگواہ مرو آ بندغ آتے زوت یلہ کننگے۔

وی بی ایم پی نا سروک نصراللہ بلوچ پارے کہ جنید و یاسر ہڑتوماک ایلم ءُ و اوفتا یلہ کپرنگ آ بھاز ڈکھیا ءُ۔ او پاریر کہ اسہ شار ئنا بندغ ئسے نا داخس ارے اسکان بیگواہی بندغی حق آتا برخلافی ئسے۔

او حکومت آن خواست کریر کہ جنید و یاسر تون اوار زوراکی ئٹ بیگوای مروک آ کل بندغ آتے زوت آن زوت آجو کننگے۔ اگہ اوفتا برخلاف ایف آئی آر گڑاس ارے تو اوفتے مون آ اتیسہ عدالت نا مون آ پاش کننگر تانکہ اوفتا خاہوت آتے زوراکی ئٹ بیگواہی نا ڈکھ آن خلاسی رسینگے۔

بلوچستان ئٹی زوراکی ئٹ بیگواہی تا چرجوئی برجا ءِ، ہراڑے واشک بیسیمہ نا ہندی ۲۰ سال نا بلوچ خوانندہ صفیہ بلوچ ءِ کوئٹہ غان زوراکی ئٹ بیگواہ کننگ نا حوال مون آ بسونے۔

شابیتی حوال آتا رد ئٹ بیسیمہ نا تولوک عبدالخالق نا مسڑ صفیہ بلوچ ءِ ۲۳ اگست ۲۰۲۶ نا نن یک بجہ نا وخت کوئٹہ غان دزگیر کریسہ زوراکی ئٹ بیگواہ کننگا۔

خاہوت نا رد ئٹ اونا زوراکی ئٹ بیگواہی ٹی سی ٹی ڈی ڈپارٹمنٹ و آئی ایس آئی نا کارندہ غان اوار ءُ۔

یات سلے کہ ہندا سال بلوچستان ئٹی نیاڑی تا زوراکی ئٹ بیگواہی تا تدینی تیٹی ودوکی خننگ ئٹ بسونے، ہرافتیا بندغی حق آتے رکھوک ادارہ تا پارہ غان خلیس و بے جاراتی نا درشانی کننگانے۔

نادرست آ بندغ آک شورہ تیٹ پین لین ئسے بھس کریر۔

سندھ، کندھ کوٹ آن رسینگوک حوال آتا رد ئٹ زور گھڑا و رانڑا نا خڑک چھاؤنی پلانٹ آن پیش تموک آ ۱۶ انچ نا گیس پین لین ءِ اینو سہب ئنا نو بجہ و بیست منٹ آ تراک اسیٹی بھس کننگا۔

گیش پیپ لین ءِ نا درست بندغ آک شورہ تیٹ نسخان تسر ہرانا سوب آن پلانٹ آن دا وخت گیس تننگ بند مس۔

تدینی آن پد نادرست آ بندغ آک ہمو جاگہ غان نرنگ ئٹ سرسہب مسر، واہم تدینی نا زمواری تے دائسکان کسس ارفتنے۔

یات سلے کہ تدوکا دے ہندا علاقہ ٹی سوئی آن کراچی آ ہنوکا سی و شش قطر نا بنجاہی گیس پیپ لین ءِ ہم تراک ئسے ٹی ٹک کننگاسس، داڑان کیہی علاقہ تے گیس تننگ بند مس۔

او تدینی نا زمواری ءِ بلوچ آزاتی خواہوک سلہہ بند گل بلوچ ریپبلکن گارڈز ارفیسس۔

نوشکے آن اسہ بندغ ئسے نا سم ئٹ خلوک جون خننگانے۔

نوشکے، گرانو نا خڑک لیویز چوکی نا ہند آ اسہ بندغ ئسے نا جون خننگانے ہرادے سمکاری کریسہ کسفنگانے۔ جون ئنا چاہنداری ہندی بندغ عطااللہ نا مار ثناءاللہ جمالدینی نا پن ئٹ مسونے ہراکہ کلی جمالدینی نوشکے نا تولوک اس ئس۔

دا بندغ نا کسفنگ نا سوب آک دائسکان سما تمتنو واہم داکان مہالو اسہ سلہہ بند جلہو اسیٹ پن کروک بندغ ٹپی مسوسس۔

سروک آک دائسکان دا بابت ئٹ ہچو شابیتی حوال اس تتنو۔

مستونگ ئٹی کوئٹہ کراچی بھلا کسر تے اوار کروک پول آتے بمب آتیٹ ٹک کننگ نا چرجوہی برجا ءِ۔ ہراڑے نادرست آ بندغ آک ارا پین پول ءِ شورہ تراک تیٹ بھس کریر۔

وسیلہ تا رد ئٹ سئے شمبے نا نن کھڈکوچہ نا علاقہ ریکی بوز نا ہند آ بھلا کسر نا زی آ کسر تے اوار کروک پول اس تراک ئسے ٹی خلنگا۔

تراک ترند وڑ ئنا اس ئسک، ہرانا سوب آن خڑک ئنا ارا تا چھت آتے ہم نسخان رسینگا۔ واہم تدینی ٹی ہچو جانی نسخان ئسے ناحوال رسینگتنے۔

ایلو تدینی ٹی چوتو مل نا خڑک اسہ پین کسر اس اوار کروک پول ئسے تراک ئسے اٹ بھس کننگا۔ ہڑتوما تدینی تیان پد کوئٹہ کراچی کسر آ ٹریفک نا ہن و بر زیمی مننگ نا خلیس نا درشانی کریسہ ءُ۔

بیست و شش اگست نا وخت آ تیوہ بلوچستان ئٹ سکیورٹی ہائی الرٹ کننگانے، کوئٹہ تون اوار ایلو شار تیٹ فورسز آتا کچ ئٹ ودکی، کیہی کسرک بند کننگانو۔

کوئٹہ ریڈ زون آ ہنوک غٹ کسر تے بے نظیر فلائی اوور، چمن پھاٹک و ایب کیب نا علاقہ تیٹ ٹرک سلفسا بند کننگانے، اندن فورسز آتا ہم بھلو کچ اس ریڈ زون نا داپار ایپار ئٹ سلفنگانے۔

استو سلہہ بند بندغ آک خاران شار ئٹ پترینگار و سرکاری مڈی تے خاخر ترسا مُسہ پولیس کارندہ دزگیر کریر اندن چوکی و سرویلینس ٹاور ءِ بھس کننگ تون اوار اہم انگا کسر تے تفیر۔

یاتی مرے اِرا سال مُست 25 و 26 اگست نا نیامیکو نن اکن بلوچ لبریشن آرمی تیوہ بلوچستان ئٹ ”اولیکو آپریشن ہیروف“ نا ردئٹ ہمگرنچ جلہو تا بنا ءِ کریسس، ہرافتیٹ بی ایل اے نا جند ندری کڑدہ مجید بریگیڈ، خاص انگا ٹولی ایس ٹی او ایس و فتح اسکواڈ کون آ کڑدہ غاتا سد آ جنگول آک بشخ ہلکر و بیست گھنٹہ اسکان تیوہ بلوچستان ئٹ حکومتی رٹ ءِ ہکل تسر۔

اندن 26 اگست بلوچستان ئٹ اہمیت تخوک ءُ دے ئسے۔ اندا دے آ بلوچستان ئٹ برجاء تحریک نا اہم انگا بندغ نواب اکبر خان بگٹی شہید کننگاسس۔ نواب اکبر بگٹی نا شہیدی آن پد بلوچستان ئٹ برجاء آجوئی نا تحریک ئٹ اسہ ڈول ترندی برسا کرینے۔

بلوچستان ئٹ تجارتی کسر آ گاڑی تیا جلہو آتا لڑ اسہ وڑ برجا، کوئٹہ تفتان تجارتی کسر آ بھلا گاڑی تا قافلہ ءِ اسہ پین جلہو اسیٹ ٹک کننگانے۔

چاغی ئٹ چہتر نا خڑک گیس پلانٹ نا ہند آ سلہہ بند بندغ آک درو تجارتی گاڑی تا قافلہ ٹی اوار  چار گاڑی ءِ تینا کوزہ ٹی کریر و اوفتیا سم کاری کریسا ناکارہ کریر تا۔

پن کروک گاڑی تے ہمو وخت ٹک کننگا ہراتم او بھلو قافلہ ئسے نا دروشم ئٹ فورسز تون اوار علاقہ غان گدرینگ ئسر واہم فورسز اوفتے رکھ تننگ ئٹ بے سہب مس۔

یک شمبے نا دے ہم چاغی نا علاقہ چارسر ئٹ تجارتی گاڑی و اوفتے رکھ تروک آ فورسز ءِ سلہہ بند بندغ آک ٹک کریسا جلہو کریر ہرا نا سوب آن فورسز نا مُسہ کارندہ نا مرگ ئنا گواچی مننگ پک مسونے۔

چارسر ئٹ مروک جلہو نا ذمہ واری ءِ بلوچ لبریشن آرمی ارفینے۔

بلوچستان نا جِتا جتا انگا شار تیٹ بلوچ سرمچار تا کاروائی نا احوال آک مون آ بسنو، ہرافتیٹی جھاؤ ئٹ پولیس چیک پوسٹ نا کنٹرول کننگ و واشک ئٹ لیویز کارندہ تے دزگیر کننگ نا تدینیک ساڑی ءُ۔

ہندی وسیلہ تا رد ئٹ سلہہ بند بندغ آک چیک پوسٹ آ ساڑی کارندہ تے دوٹی ہلنگ آن پد ساڑی سلہہ و ایلو گڑا تے تینا کوزہ ٹی ہلکور۔ ہندا وخت چیک پوسٹ آ سلوک لاری و ایلو مشین تے بن تسر۔

تدینی آن پد سلہہ بند بندغ آک علاقہ ٹی ناکہ بندی کریر، ہندا وخت ارا بندغ ءِ بندغ ءِ سم کاری کریسہ مرک ئنا گواچی کننگار ہرافتا پنک فیض و ظفر پاننگرہ۔

ہندی وسیلہ تا رد ئٹ دا ہڑتوما کارندہ غاک “ڈیتھ اسکواڈ” نا باسک ئسرہ۔ جہلو کار آک کہوک انگا بندغ آتا سلہہ تے ہم تینتون دریر۔

ایلو نیمہ غان واشک ئٹ ہم سلہہ بند بندغ آتا پارہ غان لیویز نا کارندہ آتے دزگیر کننگ نا حوال ارے۔ وسیلہ تا رِد ئٹ ہندا لیویز والاک ٹیکس ہلننگ ئسر کہ سلہہ بند بندغ آک دافتے دزگیر کریر احوال آ تا رِد ئٹ سلہہ بند بندغ آک لیویز کارندہ تا سلہہ تیتون اوار گاڑی تے ہم کوزہ کریر۔

دا تدینی تا بابت ئٹ سروک آک پارہ غان دائسکان ہچو حوال اس مون آ بتنے۔ واہم اینو نا دا جہلو نا زمہ واری تے دائسکان ہچو تنظیم اس ارفتنے۔